01.08.2022
bügünki türkiye gézitliride asasiy salmaqni igiligen xewerlirimiz töwendikiche:
türkiye awazi radiyosi: «‹höriyet› géziti», «ministir chawushoghlu <kosowuda jiddiychilikni peseytish üchün xizmet ishleshke teyyarmiz> dédi» serlewhilik xewiride, töwendiki melumatlarni oqurmenlirining diqqitige sundi:
tashqi ishlar ministiri mewlüt chawushoghlu, ammiwi ortaqlishish tor bétidiki sehipiside, sérbiye – kosowu chégra liniyesidiki jiddiychilik heqqide élan qilghan bayanatida, mundaq dédi: «sérbiye – kosowu chégra liniyesidiki jiddiychilik sewebidin, sérbiye we kosowo tashqi ishlar ministirliri bilen ayrim – ayrim halda téléfonda körüshtüm. türkiye balqan rayonining tinchliqi we muqimliqigha herdaim ehmiyet bérip kéliwatidu. rayonda yéngi sürkilishlerning otturigha chiqishining héchkimge paydisi yoq, jiddiychilikni peseytish üchün xizmet ishleshke teyyarmiz.»
«‹star› géziti», «türkiye déngizdimu muhim muweppeqiyetlerni qolgha keltüridu» serlewhilik xewiride, sanaet we téxnologiye ishliri ministiri mustafa warankning, dunyada insansiz déngiz wasitiliri mulazimetlirining emdila bashlanghanliqini bayan qilip, «eger biz türkiye bolush süpitimiz bilen uchquchisiz hawa apparatlirida namayen qilghinimizdek, insansiz déngiz wasitiliri mulazimetliridimu nahayiti zor muweppeqiyetlerni qolgha keltürsek, dunyada hemme telpünidighan döletlerdin birige aylinimiz» dégenlikini yazdi.
«‹sabah› géziti», «irangha yardem bérish üchün tiransport ayropilani ewetildi» serlewhilik xewiride, munu uchurlarni oqurmenlirining diqqitige sundi:
türkiye jumhuriyiti dölet mudapie ministirliqi teripidin tünügün élan qilinghan bayanatta, türkiyening su apitide éghir talapetke uchrighan irangha bir tiransport ayropilani arqiliq yardem buyumliri ewetkenliki bildürüldi.
«‹weten› géziti», « Togg aptomobil layihesi tamamlinish aldida turmaqta» serlewhilik xewiride, türkiye aptomobil karxanichiliri guruhi (Togg) ning yuqiri derijilik bashqurghuchisi mehmet gürkan qaraqashning, 2023-yilining birinchi peslide türkiyede we shuningdin 18 ay kéyin yawropada yollarda bolidighanliqini éytqanliqini xewer qildi.
«‹yéngi shepeq› géziti», «topraq razgatlioghlu chéxiyede birinchi boldi» serlewhilik xewiride, türkiye memliketlik motosiklit mahiri topraq razgatlioghluning, chéxiyede ötküzülgen dunya derijidin tashqiri motosiklit lewhe talishish musabiqiside birinchi bolghanliqini oqurmenlirining diqqitige sundi.
