11.05.2022

бүгүнки түркийә мәтбуатида орун алған муһим хәвәрләрниң қисқичә мәзмунлири төвәндикичә:

1825298
11.05.2022

түркийә авази радийоси: «һүррийәт» гезити: «түркийә билән қазақистан оттурисида 15 түрлүк келишим имзаланди» сәрләвһилик хәвиридә, қазақистан пирезиденти қасим җөмәрт токайевниң пайтәхт әнқәрәдә дөләт ишлири зийаритидә болғанлиқи؛ зийарәт җәрйанида түркийә билән қазақистан оттурисида қатнаш, мудапиә санаити, һәрбий ахбарат, учур техникиси, мәдәнийәт, йеза - игилик, қатнаш, сода, таможна, муһит, маарип, йашлар, алақә вә архип қатарлиқ 15 саһә бойичә келишим имзаланғанлиқи тоғрисидики учурларға орун бәрди.

«хабәртүрк» гезити: «әрдоғанла русийә - украина уруши түрк дөләтлири тәшкилатиниң әһмийитини намайан қилди (деди)» сәрләвһилик хәвиридә, җумһур рәис рәҗәп таййип әрдоғанниң, русийә - украина урушиниң түрк дөләтлири тәшкилати сепидики иттипақлиқ вә һәмкарлиқниң әһмийитини йәнә бир қетим намайан қилип бәргәнликини билдүрүп, қазақистан пирезиденти қасим җөмәрт токайев билән түркийә билән қазақистанниң, түрк дөләтлири тәшкилати, бирләшкән дөләтләр тәшкилати, ислам һәмкарлиқ тәшкилати вә иқтисадий һәмкарлиқ тәшкилати қатарлиқ супилардики һәмкарлиқини давамлаштуруш ирадисини йәнә бир қетим тәкитләп өткәнликлирини ейтқанлиқини оқурмәнлириниң диққитигә сунди.

«сабаһ» гезити: «түркийәниң йеңи чегра еғизи: ризә – артвин айродуруми» сәрләвһилик хәвиридә, ризә – артвин айродуруминиң хәлқаралиқ кириш – чиқишларға очуқ даимий чегра еғизи қилип бекитилгәнликини؛ айродурумниң 14 – майда җумһур рәис рәҗәп таййип әрдоған билән әзәрбәйҗан пирезиденти илһам әлийев иштирак қилидиған мурасим арқилиқ хизмәткә кириштүрүлидиғанлиқи тоғрисидики учурларға орун бәрди.

«йеңи шәпәқ» гезити: «әзәрбәйҗанда технологийә фестивали (байрими) тәнтәниси» сәрләвһилик хәвиридә, дунйаниң әң чоң авийатсийә, аләм бошлуқи вә техника байрими — текнофестниң 26 - майдин 29 - майғичә әзәрбәйҗанниң пайтәхти бакудики хирустал зал вә деңиз қирғиқи дөләт бағчисида өткүзүлидиғанлиқини, 4 күн давамлишидиған фестивалниң зийарәтчиләргә һайаҗанлиқ ләһзиләрни бәхш қилидиғанлиқини йазди.

«стар» гезити: «түркийәдики бор записи дунйаниң миң йиллиқ еһтийаҗини қандуралайду» сәрләвһилик хәвиридә, әти кан башқуруш идариси башлиқи, шундақла баш мудири сәркан кәләшәрниң, түркийәниң дунйа бор записиниң 73 пирсәнтигә игә икәнликини байан қилип: «йалғуз түркийәла дунйани тәхминән миң йил бойичә бор билән тәминлийәләйду» дегәнликини йазди.

гезитниң хәвиридә көрситилишичә, бор канлири кәлгүсидики енергийә мәнбәлириниң бири дәп қарилидикән.



مۇناسىۋەتلىك خەۋەرلەر