21.01.2022

бүгүнки түркийә мәтбуатлиридин таллап тәййарлиған хәвәрлиримизниң қисқичә мәзмунлири төвәндикичә:

1766043
21.01.2022

түркийә авази радийоси: «сабаһ» гезити: «әрдоғанниң бирләшмә ахбарат елан қилиш йиғинидики байанатлири» сәрләвһилик хәвиридә, җумһур рәис рәҗәп таййип әрдоғанниң түнүгүн салвадор пирезиденти найиб букеле билән өткүзгән бирләшмә мухбирларни күтүвелиш йиғинида русийә - украина җиддийчилики тоғрисида тохтилип: «бизниң арзуйимиз (русийә пирезиденти виладимир) путин билән (украина пирезиденти виладимир) зеленскийни бир йәргә җәм қилиш, йүзтуранә көрүшүшлирини капаләтләндүрүш» дегәнликини оқурмәнлири билән ортақлашти.

«хабәртүрк» гезити: «чавушоғлу рум тәрипигә наразилиқ билдүрди» сәрләвһилик хәвиридә, дөлитимиз (түркийә җумһурийити) ташқи ишлар министири мәвлүт чавушоғлуниң, қибрис рум тәрипиниң бөлгүнчи террорлуқ тәшкилати п к к ниң аталмиш сийасий қанити болған п й д ниң өз тәвәликидә ишхана ечишиға рухсәт қилғанлиқи тоғрисида тохтилип: «террорлуқ тәшкилатлириға ишхана ачқузуш, уларға саһибханлиқ қилиш от билән ойнишиштур. улар бу йәрдә уларниң ишхана ечишиға йол қойуватиду. кәлгүсидә бу йәрдин түркийәгә тәһдит селинип, қибрис түрклиригә һуҗум қилинип қалса, биз буниң бәдилини төләткүзимиз, бу бәдәл еғир болиду, улар от билән ойнимисун, террорлуқ тәшкилатлири билән һәмкарлиқ орнатмисун» дегәнликини йазди.

«һөррийәт» гезити: «министир коҗа <бу дунйада бир йеңилиқ болиду> дәп елан қилди» сәрләвһилик хәвиридә, сәһийә министири фаһрәттин коҗаниң: « икки қута бионтек ваксинисиға илавә бир қута турковак ваксиниси селишни башлаймиз. MRNA ниң үстигә актипланмиған ваксина әмләш дунйада тунҗи қетимлиқ иш болиду» дегәнликини йазди.

«стар» гезити: «түркийә базисиға 6-қетимлиқ чарлаш сәпири» сәрләвһилик хәвиридә, (түркийә) санаәт вә технологийә министири мустапа варанкниң йәнә икки күндин кейин антарктикаға алтинчи қетимлиқ екиспедитсийә сәпириниң башлинидиғанлиқини байан қилип: «силәргиму мәлум болғинидәк, биз 2017- йилдин буйан чоң қуруқлуққа 5 қетим илим - пән екиспедитсийәси тәшкиллидуқ. иншааллаһ, икки күндин кейин 20 кишилик гуруппа билән 6- қетимлиқ екиспедитсийәмизни башлаймиз» дегәнликини оқурмәнлири билән ортақлашти.

«вәтән» гезити: «османли султанлириниң әнгилийәдики рәсимлири 1 милйон 346 миң фондстерлиңға сетилди» сәрләвһилик хәвиридә, шотландийәлик бир қанчә әвлад бир аилә кишилири йашап кәлгән бир өйниң йуқири қәвитидин тепилған бәш османли султаниниң май бойақ рәсимлириниң бир милйон 346 миң фондстерлиңға сетилғанлиқиға даир учурларға орун бәрди.



مۇناسىۋەتلىك خەۋەرلەر