19.01.2022
bügünki türkiye gézitliride asasiy salmaqni igiligen xewerlirimiz töwendikiche:
türkiye awazi radiyosi: «‹weten› géziti», «türkiyedin xelqara jamaetchilikke bosniye-girtisgowéna chaqiriqi» serlewhilik xewiride, töwendiki melumatlarni oqurmenlirining diqqitige sundi:
jumhur reis rejep tayyip erdoghan, sérbiyening bosniye-girtisgowénaning igilik hoquqi we zémin pütünlükini qollishining balqan rayonining tinchliqi we muqimliqi jehettin nahayiti zor ehmiyetke ige ikenlikini eskertish bilen bir waqitta, bosniye-girtisgowénaning zémin pütünlükige ziyan yetküzidighan heriketlerdin yiraq turush toghruluq chaqiriqta bolup mundaq dédi: «bosniye-girtisgowénadiki kirizisning hel qilinishi üchün xelqara jamaetchilikning birlikte heriket qilishining zörürlüki hemmige ayan.»
«‹xewer türk› géziti», «erdoghan, <urushni siyaset tarixidin öchürüp tashlishimiz lazim> dédi» serlewhilik xewiride, munu uchurlarni oqurmenlirining diqqitige sundi:
jumhur reis rejep tayyip erdoghan, «rusiyening ukrainani ishghal qilishi toghra pozitsiye emes» dep qaraydighanliqlirini tekitlep mundaq dédi: «rusiye pirézidénti wiladimir putin bilenmu bu mesililer heqqide söhbet ötküzüshimiz kérek, chünki bu rayonlar emdi urushni qobul qilalmaydu, derweqe, bular toghrimu emes, emdi urushni siyaset tarixidin öchürüp tashilishimiz lazim.»
«‹star› géziti», «erdoghan, <néfit tinchliqning wasitisi bolsa, bu wasitidin paydilinishimiz mumkin> dédi» serlewhilik xewiride, munu uchurlargha orun ajratti:
sherqiy aqdéngizde israiliye bilen hemkarliq ornitish éhtimalliqi heqqide toxtalghan jumhur reis erdoghan, «israiliye pirézidénti yitzaq hértzog türkiyede ziyarette bolushi mumkin. biz siyasetchilerning qilidighan ishi tinchliq ornitishtur. néfit tinchliqning wasitisi bolsa, bu wasitidin paydilinishimiz mumkin. bu, <hemme terep qazansun> pirinsipigha asaslansa, bizmu qolimizdin kélishiche tirishchanliq körsitimiz.»
«‹höriyet› géziti», «türkiyening iqtisadiy tereqqiyati % 10 tin ashidu» serlewhilik xewiride, munu uchurlarni oqurmenlirining diqqitige sundi:
türkiye iqtisadiy maslashturush komitétining muawin jumhur reis fuat oktayning riyasetchilikide chaqirilghan yighinidin kéyin élan qilinghan bayanatida, mundaq déyildi: «2021 – yilining axirqi chariki heqqide élan qilinghan sanliq melumatlar, türkiyening iqtisadiy tereqqiyatining yenimu yüksek sewiyede dawamlishidighanliqini ispatlap berdi. bu dairide, türkiyening 2022 – yilliq ichki ishlepchiqirish omumiy qimmitining % 10 tin yuqiri sewiyege yétishi kütülmekte.»
«‹yéngi shepeq› géziti», «türkiyening oyun sahesi 2022 – yilighimu nahayiti zor muweppeqiyetlerni qolgha keltürgen halda qedem qoydi» serlewhilik xewiride, töwendiki uchurlargha orun ajratti:
türkiye 500 din artuq istudiyesi bilen yanfun oyunlirini layihelesh, yasash we tereqqiy qildurush jehette dunyadiki aldinqi qatardiki döletlerning biri. 255 milyon dollarliq yéngi mebleghke érishishni qolgha keltürgen türkiye yanfun oyunliri shirkiti Dream Games, sermayisini 2 milyard 750 milyon dollargha yetküzüp, dunyadiki eng qimmetlik yanfun oyunliri shirketliridin birige aylandi. Spyke Games shirkiti, 55 milyon dollarliq mebleghke érishti.
