23.09.2021

бүгүнки түркийә гезитлиридә асасий салмақни игилигән хәвәрлиримиз төвәндикичә:

1709605
23.09.2021

«‹йеңи шәпәқ› гезити», «әрдоған: <америка 20 йилниң җавабини бәрсун> деди» сәрләвһилик хәвиридә, муну учурларға орун аҗратти:
җумһур рәис рәҗәп таййип әрдоған американиң «CBS» телевизийә қанилиға қилған сөзидә, американиң афғанистан панаһланғучилири мәсилисидә техиму көп мәсулийәтни үстигә елиши керәкликини оттуриға қойуп: «америка 20 йилдин буйан афғанистанда немә үчүн мәвҗут иди? алди билән бу соалға җаваб бериши керәк» деди.
«‹хәвәр түрк› гезити», «мәлүт чавушоғлу афғанистан вә аракан мәсилисидә дунйаға чақириқ елан қилди?» сәрләвһилик хәвиридә, муну учурларға орун аҗратти:
ташқи ишлар министири мәвлут чавушоғлу  «афғанистан» темилиқ г 20 дөләтләр гуруһи ташқи ишлар министирлири йиғинида «хәлқара җәмийәт афғанистан билән болған алақисини давамлаштуруши керәк» дегәнни тәкитлиди вә бирләшкән дөләтләр тәшкилатиниң 76-нөвәтлик омумий йиғини даирисидә аракан мусулманлириниң әһвали тоғрисида өткүзүлгән тор йиғинида сөз қилип. «биз роһинга мусулманлирини өз тәқдиригә һәргиз ташлап қоймаймиз» деди.
«‹һөрийәт› гезити»,  «түркийә билән америка қойуқ алақини давамлаштуриду» сәрләвһилик хәвиридә, муну учурларға орун аҗратти:
җумһур рәислик байанатчиси ибраһим калин ақсарайда америка дөләт бихәтәрлик мәслиһәтчиси җәйк сулливан билән көрүшти. учришишта икки тәрәплик мунасивәт, ковид -19 вә йәр шари келимат өзгириши шундақла афғанистан, сүрийә, ирақ, ливийә, сипрус, шәрқий ақ деңиз вә башқа район тәрәққийатлири музакирә қилинди.
«‹сабаһ› гезити»,  «шималий қибрис түрк җумһурийити пирезиденти әрсин татар: <әрдоған б д т да бизниң садайимиз болди» сәрләвһилик хәвиридә, муну учурларға орун аҗратти:
шималий қибрис түрк җумһурийити пирезиденти әрсин татар җумһур рәис рәҗәп таййип әрдоғанниң 76-нөвәтлик бирләшкән дөләтләр тәшкилати омумий йиғинида қилған сөзлири үстидә тохтилип: «һөрмәтлик җумһур рәис әрдоған бу мәсилидә хәлқара җәмийәткә чақириқ елан қилиш арқилиқ бизниң садайимиз вә күчимиз болди» деди. әрсин татар қибрис мәсилисини һәл қилишта бирдинбир йолниң баравәр игилик һоқуқиға игә болуш икәнликини оттуриға қойди.
«‹вәтән› гезити», «байрақтар т б 3 учқучисиз айропилани 2022 -йили тунҗи учишини ишқа ашуриду» сәрләвһилик хәвиридә, муну учурларға орун аҗратти:
«TEKNOFEST» мудирийәт рәиси сәлчуқ байрақтар қанити қатлинидиған, қисқа мусапилик қонуш вә учуш иқтидари болған шундақла сүний һәмраһ контроллуқи билән нәччә миң киломитир йол йүрәләйдиған байрақтар  т б 3 қораллиқ учқучисиз айропиланниң тунҗи учушини 2022-йили ишқа ашуридиғанлиқини ейтти. сәлчуқ байрақтар: «биз йәнә дунйаға йөнилиш бәлгиләйдиған учқучисиз күрәшчи айропиланлиримизни тәрәққий қилдуримиз» деди вә робут учқучисиз айропиланларниму тәрәққий қилдурғанлиқини тәкитләп, бу лайиһәләрни «инқилаб характерлиқ» дәп тәриплиди. 



مۇناسىۋەتلىك خەۋەرلەر