22.09.2021

бүгүнки түркийә мәтбуатлиридин таллап тәййарлиған хәвәрлиримизниң қисқичә мәзмунлири төвәндикичә:

1709092
22.09.2021

түркийә авази радийоси хәвири: «хабәртүрк» гезити: «әрдоған: районда түркийәгә сәл қарайдиған чүшәнчидин ваз кечиш керәк (деди)» сәрләвһилик хәвиридә, җумһур рәис рәҗәп таййип әрдоғанниң бирләшкән дөләтләр тәшкилати (б д т) омумий кеңишидики сөзидә, районда шәрқий ақдеңизниң әң узун деңиз қирғиқиға игә дөлити түркийәгә сәл қарайдиған чүшәнчидин ваз кечишниң моһимлиқини тәкитләп: «бизниң дийалог вә һәмкарлиқни капаләткә игә қилиш үчүн райондики барлиқ күчләр иштирак қилидиған <шәрқий ақдеңиз йиғини> тәшкилләш тәклипимиз һелиһәм күчкә игә» дегәнлики, һәмдә қибрис түрк хәлқиниң хәлқаралиқ салаһийитиниң тизимға елиниши керәкликини оттуриға қойғанлиқи тоғрисидики учурларға орун бәрди.

«һөррийәт» гезити: «әрдоған дунйаға турковак хуш хәвири (ни бәрди)» сәрләвһилик хәвиридә, җумһур рәис әрдоғанниң, түркийәниң йуқум оттуриға чиққан күндин тартипла қолидики имканийәтләрни дост вә қериндашлири билән ортақлишишқа тиришип кәлгәнликини оттуриға қойғанлиқини йазди.

гезитниң хәвиридә көрситилишичә, «159 дөләт вә 12 хәлқаралиқ органға теббий йардәм йоллидуқ» дегән әрдоған, түркийәниң йәрлик ваксиниси турковакниң йеқинда пүткүл инсанийәтниң пайдилинишиға сунулидиғанлиқини тәкитлигән.

«йеңи шәпәқ» гезити: «әрдоғанниң <техиму адил дунйа бәрпа қилиш мумкин > намлиқ китаби нйуйорктики чоң екранларда тонуштурулди» сәрләвһилик хәвиридә, җумһур рәис әрдоғанниң «техиму адил дунйа бәрпа қилиш мумкин» намлиқ китабиниң нйуйорк шәһириниң мәркизидики коча вә йоллар билән таймс мәйданидики чоң екранларда тонуштурулғанлиқини؛ дунйа сийаситиниң адаләтсизлик, мусапирлар киризиси, хәлқара террорлуқ вә исламға өчмәнлик қилиш дегәндәк чегиш мәсилилири орун алған китабниң йәнә әрдоған бирләшкән дөләтләр тәшкилати омумий кеңиши йиғини җәрйанида көрүшкән әза дөләтләрниң рәһбәрлиригә һәдийә қилинғанлиқини йазди.

«вәтән» гезити: «текнофест һайаҗини башланди» сәрләвһилик хәвиридә, дунйаниң әң чоң авийатсийә, аләм бошлуқи вә технологийә фестивали болған текнофест (TEKNOFEST) һайаҗининиң түнүгүн истанбулдики ататүрк айродурумида башланғанлиқи, 26 – сентәбиргичә давамлишидиған фестивал җәрйанида түркийә армийәсиниң һавада номур көрситиш әтрити – солотүрк вә түрк чолпанлириниң истанбул асминида номур көрсәткәнлики, текнофестта дәриҗигә еришкән әтрәтләргә бәш милйон лирадин артуқ мукапат тарқитип берилидиғанлиқи тоғрисидики учурларға орун бәрди.

«стар» гезити: «дунйада тунҗи қетим түркийәдә қилинди» сәрләвһилик хәвиридә, T3 фондиниң рәиси, қошумчә текнофест идарә һәйити башлиқи сәлчуқ байрақтарниң,  бу қетимқи технологийә фестивалида учқучисиз һава аппаратлири билән һава қораллириниң охшаш йәрдә иқтидарини намайан қилғанлиқини  тилға елип, «билишимизчә, дунйада бундақ бир көргәзминиң қилиниши тунҗи қетимлиқ иш» дегәнликини йазди.



مۇناسىۋەتلىك خەۋەرلەر