30.07.2021

бүгүнки түркийә мәтбуатлиридин таллап тәййарлиған хәвәрлиримизниң қисқичә мәзмунлири төвәндикичә:

1682714
30.07.2021

түркийә авази радийоси: «сабаһ» гезити: «әзәрбәйҗан билән түркийәни туташтуридиған каридор» сәрләвһилик хәвиридә, адаләт вә тәрәққийат партийәси муавин башлиқи нуман қуртулмуш, әзәрбәйҗанни түрк дунйаси вә түркийә билән туташтуридиған зәнгәзур каридориниң интайин муһимлиқини тәкитләп: «әгәр бу каридор ройапқа чиқса, бакуғила әмәс, түрк җумһурийәтлиригиму үзлүксиз қатнаш пурсити оттуриға чиқиду» дегәнликини йазди.

«һөррийәт» гезити: «түркийә ливийәдики муназирә тәләп қилмайдиған күчләрниң бири» сәрләвһилик хәвиридә, йавропа иттипақи ташқи мунасивәтләр вә хәвпсизлик сийасәтлири али вәкили җосеп боррелниң, испанийәниң «ел паис» гезитигә байанат берип, түркийәниң ливийәдә муһим күчкә айланғанлиқини, ливийәдә түркийә деңиз армийә базилириниң барлиқини тәкитлигәнлики вә «бу түркийәниң ақдеңиз арқилиқ көчүшкә тәсир көрситидиғанлиқидин дерәк бериду» дегәнликини оқурмәнлириниң диққитигә сунди.

«йеңи шәпәқ» гезити: «афғанистан көчмәнлиригә қарши үч тәдбир» сәрләвһилик хәвиридә, афғанистандин келидиған көчмәнләргә қарши тәдбирләрниң күчәйтиливатқанлиқини, бу даиридә түркийә армийәсиниң үч басқучлуқ бихәтәрлик системисини йолға қойғанлиқини йазди.

гезитниң хәвиридә көрситилишичә, биринчи басқучта көзитиш, контрол қилиш, чарлаш؛ иккинчи басқучта алдини тораш؛ үчинчи басқучта қолға елип чеградин қоғлап чиқириш түзүми йолға қойулидикән. бихәтәрлик мәнбәлири, иҗтимаий таратқулардики афғанистан мусапирлириға аит фото - сүрәтләрниң көпинчисиниң йеңи һәмдә түркийә чегралириға тәвә әмәсликини уқтурған.

«стар» гезити: «тәбиий газ тоғрисида йеңи хуш хәвәр бериш пәқәт вақит мәсилиси» сәрләвһилик хәвиридә, енергийә вә тәбиий байлиқ министири фатиһ дөнмәзниң тәбиий газ байқашлири һәққидә байанат елан қилип: «биз бу йәрдә (қара деңизда) бизгә 10 йил йәткүдәк газни байқидуқ. байқашлар давамлишиватиду вә үмидвармиз. мушу йилниң ахири йаки келәр йилиниң бешида ғәрб тәрәптин хуш хәвәр беришимиз мумкин. мәқситимиз енергийәдә чәткә тайинишчанлиқни нөлгә чүшүрүштин ибарәт» дегәнликини йазди.

«вәтән» гезити: «түркийәниң йеңи күчи санҗақ» сәрләвһилик хәвиридә, америка «мудапиә хәвәрлири» торида елан қилған бир хәвәрдә, түркийә тәтқиқ қилип йасап чиққан «санҗақ»ниң әвзәл иқтидарлириниң тонуштурулғанлиқи тоғрисидики учурларға орун бәрди.

гезитниң хәвиридә көрситилишичә, хәвәрдә, мәзкур системиниң қуруқлоқ, һава вә қуруқлуқтин зәрбә бериш һәрикити елип берип йеқин арилиқтин тик долқунлар арқилиқ нишан үскүниләрниң сигналини қалаймиқанлаштуруветәләйдиғанлиқи вә алақигә дәхли қилалайдиғанлиқи тоғрисидики учур алаһидә тәкитләнгән болуп, «бу система йуқири частотилиқ үскүниләрни чәкләшкә мәркәзләшкән. бу арқилиқ қарши тәрәптики үскүнигә йалған учур йоллап, дост қисимларниң тактика саһәсидә әвзәлликкә еришишигә капаләтлик қилиниду» дейилгән.



مۇناسىۋەتلىك خەۋەرلەر