04.06.2021

türkiye awazi radiyosi: «hörriyet» géziti: «türkiyening amérikadin kütüwatqini» serlewhilik xewiride, adalet we tereqqiyat partiyesi bayanatchisi ömer chelikning, jumhur reis rejep tayyip erdoghan bilen amérika pirézidénti jo baydinning 14 - iyun bélgiyening paytexti biryussélda ötküzülidighan uchrishishi toghrisidiki bayanatida, hemkarliq ornitish sahelirining talash – tartishliq sahelerdin köp ikenlikini bildürüp, amérikaning fethullahchi térrorluq teshkilati (fetö)ni qanat astigha élishtin waz kéchishi we bölgünchi térrorluq teshkilati p k k ning dawami bolghan p y d / y p g ni qollimasliqi kéreklikini otturigha qoyghanliqi toghrisidiki uchurlargha orun berdi.

«yéngi shepeq» géziti: «türk sihaliri (qoralliq uchquchisiz hawa apparaliri) dunyaning qiziqish nuqtisi bolushni dawamlashturmaqta» serlewhilik xewiride, amérikaning «wal strit zhurnal» gézitining türk qoralliq uchquchisiz hawa apparati — Bayraktar TB2 gha bash bétidin orun bérip, türkiyede ishlengen qoralliq uchquchisiz hawa apparati (SİHA) ning jeng sahesini qaytidin shekillendürgenlikini, Bayraktar TB2 ning öz türidiki hawa apparatlirigha sélishturghanda, iqtidarining yuqiri we tennerxining muwapiq ikenlikini, uning süriye, liwiye we ezerbeyjandiki weziyetni özige paydiliq terepke özgertkenlikini otturigha qoyghanliqini yazdi.

«weten» géziti: «türkiye bilen shimaliy qibris türk jumhuriyiti otturisida soda we iqtisadiy hemkarliq (ornitildi)» serlewhilik xewiride, türkiye bilen shimaliy qibris türk jumhuriyiti otturisida soda we iqtisadiy hemkarliqni tereqqiy qildurush kélishimnamisi imzalanghanliqini, türkiye soda ministiri mehmet mushning imza qoyush murasimida söz qilip: 84 milyon nopusi, jughrapiyelik orni we chong tiptiki dölet ichi baziri bilen nurghun xelqaraliq shirketlerning rayondiki asasiy bazisigha aylanghan türkiyening, shimaliy qibris türk jumhuriyitining dunyagha échilghan derwazisi xaraktérige ige ikenlikini éytqanliqini yazdi.

«star» géziti: «tatar: biz qibrista yaxshi niyet we berpachi pozitsiyeni dawamlashturimiz (dédi)» serlewhilik xewiride, shimaliy qibris türk jumhuriyiti jumhur reisi ersin tatarning jenubiy qibris rim dairiliri rehbiri nikos anastadiyadis bilen ötküzgen sin körünüshlük söhbiti jeryanida, rayonning güllinishi we muqimliqini közde tutup, ikki terep otturisidiki hemkarliqni qolgha keltürüsh tirishchanliqini yaxshi niyet we berpachi pozitsiye bilen dawamlashturidighanliqlirini bildürgenlikini, hemde araldiki ikki xelqning menpeetini qoghdash üchün, qarshi tereptinmu mushundaq ijabiy pozitsiyede bolushini kütidighanliqini otturigha qoyghanliqini yazdi.

«sabah» géziti: «ékologiyelik sayahetning yéngi adrési — türkiye» serlewhilik xewiride, dunyada aldinqi pilandin orun élishqa bashlighan ékologiyelik sayahetning yéngi adrésining türkiye bolidighanliqini؛ ormanchiliq bash idarisining 2021  -  2025 – yilliq xizmet pilani dairisidiki 110 yönilishte, sayahetchilerning tebiet bilen yalghuz qélip köngüldikidek dem élish bilen bir waqitta, muhitning tarixiy we medeniyet qimmitidinmu behriman bolush pursitige érishidighanliqini, sayahetchilerning köchme yéteklesh üskünilirining yardimi sayisida mezkur sayahet orunlirigha bimalal yétip baralaydighanliqini yazdi.