01.06.2021

бүгүнки түркийә мәтбуатлиридин таллап тәййарлиған хәвәрлиримизниң қисқичә мәзмунлири төвәндикичә:

1649389
01.06.2021

түркийә авази радийоси: «йеңи шәпәқ гезити», түркийә җумһур рәиси рәҗәп таййип әрдоғанниң кабент йиғинидин байанат елан қилғанлиқини хәвәр қилди.

хәвәрдә, ийун ейида сиртқа чиқиш чәклимилириниң һәптә ичи вә шәнбә күнлири 22:00 дә башлинидиғанлиқини, һәптә ахири шәнбә күнлири 22:00 дин дүшәнбә күнлири 05:00 кичә толуқ чәклиминиң иҗра қилинидиғанлиқи билдүрүлди.

хәвәрдә, ресторан вә йемәк-ичмәк саһәсини өз ичигә алған нурғун сода орунлириниң йәкшәнбә күнлиридин башқа күнләрдә әтигән саәт 07:00 дин кәч саәт 21:00 гичә мулазимәт қилалайдиғанлиқи қәйт қилинди.

«һөррийәт гезити», ташқи ишлар министири мәвлүт чавушоғлуниң: «америка йеңи һөкүмитидә техиму йахши мунасивәттә болуш ғәйрити бар. ‹S-400› ләрни ишләтмәңлар, дегән тәклипини қобул қилғили болмайду. америка S-400 мәсилисидә йумшимиди. пирезидент байдин җумһур рәисимиз билән телефонда көрүшкәндә, ‹халисиңиз биз силәр билән йеқин мунасивәттә болушни халаймиз, әмма мәвҗут мәсилилиримизни һәл қилишимиз лазим› деди » дәп байанат елан қилғанлиқини хәвәр қилди.

«хәбәр түрк гезити», руменийәдә өткүзүлгән 26 дөләттин 30 миңдин артуқ әскәр қатнашқан «2021-йиллиқ нато мустәһкәм қоғдиғучи йавропа» маневирида, түркийә әскәрлириниң маневирға иштирак қилғанларни һәйран қалдурғанлиқини хәвәр қилди.

хәвәрдә, түркийә әскәрлири қурған дала ашханиси, мунча вә һаҗәтхана қатарлиқ әслиһәләрниң махташқа сазавәр болғанлиқи билдүрүлди.

«сабаһ гезити», б д т доклатида, түркийәдә йасалған «2-каргу» намлиқ учқучисиз һава аппаратлириниң дунйа тарихида йеңи рекорт йаратқанлиқини хәвәр қилди.

хәвәрдә, сүний әқил системилириға игә «2-каргу» намлиқ учқучисиз һава аппаратлириниң, ливийәдә һәрбий исйанчи һафтәр қисимлириға қарши қолға кәлтүрүлгән ғәлибиләрдә намайан қилған артуқчилиқлириниң, дунйа таратқулириниң күнтәртипи болғанлиқи қәйт қилинди.



مۇناسىۋەتلىك خەۋەرلەر