07.04.2021
bügünki türkiye gézitliride asasiy salmaqni igiligen xewerlirimiz töwendikiche:
türkiye awazi radiyosi: «‹star› géziti», «qalin jumhur reis erdoghanning yawropa ittipaqi rehberliri bilen élip barghan muhim uchrishishliridin kéyin bayanat élan qildi» serlewhilik xewiride, töwendiki melumatlarni oqurmenlirining diqqitige sundi:
jumhur reislik mehkimisi bayanatchisi ibrahim qalin, jumhur reis rejep tayyip erdoghanning, yawropa ittipaqi komitétining bashliqi ursula won dér léyén we yawropa kéngishining bashliqi charlés michél bilen élip barghan uchrishishining muweppeqiyetlik ötkenlikini, uchrishishta, jumhur reis erdoghanning, yawropa ittipaqi – türkiye munasiwetlirining kélechiki heqqide türkiyening köz – qarashlirini otturigha qoyup, türkiyening yawropa ittipaqi musapisining axirqi nishanining yawropa ittipaqigha toluq eza bolush ikenlikini eskertkenlikini éytti.
«‹yéngi shepeq› géziti», «jumhur reislik sariyida yawropa ittipaqi rehberliri bilen muhim uchrishish» serlewhilik xewiride, töwendiki melumatlargha orun ajratti:
yawropa kéngishining bashliqi charlés michél, jumhur reis rejep tayyip erdoghan bilen élip barghan uchrishishtin kéyin élan qilghan bayanatida, mundaq dédi: «yawropa ittipaqi - türkiye otturisidiki iqtisadiy, hemkarliq, köchmenlik we xelqler ara munasiwetlerni kücheytish üchün ijabiy küntertip sunushqa teyyarmiz.»
yawropa ittipaqi komitétining bashliqi ursula won dér léyén, mundaq dédi: «tamozhna birliki belgilimilirining ijra qilinishigha munasiwetlik mewjut qiyinchiliqlar heqqide muzakire élip bérip, yéngilash üchün xizmet ishleymiz.»
«‹höriyet› géziti», «blombérgdin maxtashlar bilen tolup tashqan xewer» serlewhilik xewiride, munu uchurlarni oqurmenlirining diqqitige sundi:
merkizi amérika qoshma ishtatlirigha jaylashqan «‹blombérg› iqtisad géziti», bolupmu ezerbeyjan teripidin taghliq qarabaghda qolgha keltürülgen muweppeqiyetning perde arqisida türkiyening qoralliq uchquchisiz hawa apparatlirining barliqini tekitlep «bayqar shirkitining < TB2> tipliq qoralliq uchquchisiz hawa apparatliri liwiye we ezerbeyjandiki toqunushlarning teqdirini belgilidi» ibarilirige orun ajratti.
«‹weten› géziti», «< turkishsouq.com > tor béti arqiliq pütkül dunyadin soda – sétiq qilghili bolidu» serlewhilik xewiride, töwendiki uchurlarni oqurmenliri bilen ortaqlashti:
qatnash we ul eslihe qurulushliri ministiri adil qarasmailoghlu, « turkishsouq.com » tor béti arqiliq engliyedin italiyegiche, shiwétsiyedin portugaliyegiche, rusiyedin awstraliyegiche, kanadadin biraziliyegiche oxshimighan 47 döletke mehsulat éksport qilinishtek yaxshi sharaitning shekillengenlikini tekitlep mundaq dédi: «texminen 300 ming mehsulatimiz dunya bazarlirigha sélinmaqta.»
«‹sabah› géziti», «istanbul ayrodurumi 17 ming qétimliq uchush bilen yawropa boyiche aldinqi rettiki ornini saqlap qaldi» serlewhilik xewiride, töwendiki uchurlargha orun ajratti:
yawropa awiyasiye yol bashlash bixeterlik teshkilati (EUROCONTROL) ning, 1 – marttin 31 – martqiche bolghan ayropilan seperlirige alaqidar doklatigha qarighanda, istanbul ayrodurumi, künige otturiche 17 ming 407 qétimliq uchush bilen, yawropa boyiche aldinqi rettiki ornini saqlap qalghan.
