26.02.2021

تۈركىيە ئاۋازى رادىيوسى: «ھۆررىيەت» گېزىتى: «جۇمھۇر رەئىسلىك مەھكىمىسى باياناتچىسى قالىن: <ئەرمېنىيەدىكى سىياسىي ئۆزگىرىشنى ئەيىبلەيمىز> (دېدى)» سەرلەۋھىلىك خەۋىرىدە، (تۈركىيە جۇمھۇرىيىتى) جۇمھۇر رەئىسلىك مەھكىمىسى باياناتچىسى ئىبراھىم قالىننىڭ ئىجتىمائىي تاراتقۇدىكى ئادرېسىدا ئېلان قىلغان باياناتىدا، تۈركىيەنىڭ ئەرمېنىيەدىكى سىياسىي ئۆزگىرىش ھەربىي – سىياسىي ئۆزگىرىش قوزغاشقا ئۇرۇنۇش قىلمىشىنى ئەيىبلەيدىغانلىقىنى بىلدۈرۈپ: «بىز ئەرمېنىيەدىكى سىياسىي ئۆزگىرىشنى ئەيىبلەيمىز. سىياسىي ئۆزگىرىشلەر ئەزەلدىن دېموكراتىك جەريانلارنى ئاقسىتىپ، قالايمىقانچىلىق كەلتۈرۈپ چىقىرىپ كەلدى. بىز ئەرمېنىيە ۋەزىيىتىنىڭ دەرھال نورمال ھالەتكە كېلىشىنى ئۈمىد قىلىمىز» دېگەنلىكىنى ئوقۇرمەنلىرى بىلەن ئورتاقلاشتى.

«ستار» گېزىتى: «ياۋروپا ئىتتىپاقى يەنە بىر قېتىم ئاگاھلاندۇرۇپ: <تۈركىيە بىلەن ھەمكارلىق ئورنىتىش كېرەك> (دېدى)» سەرلەۋھىلىك خەۋىرىدە، ۋېنگىرىيە دىپلوماتىيە، قوشۇمچە تاشقى سودا مىنىستىرى پېتىر سيججارتو، ياۋروپا ئىتتىپاقىنىڭ پاناھلىق تىلىگۈچىلەر مەسىلىسىدە تۈركىيە بىلەن ھەمكارلىشىشنىڭ زۆرۈرلۈكىنى، ئەكسىچە بولغاندا، ياۋروپا ئىتتىپاقىنىڭ بىخەتەرلىك مەسىلىسىگە دۇچ كېلىدىغانلىقىنى ئوتتۇرىغا قويغانلىقىغا دائىر ئۇچۇرلارغا ئورۇن بەردى.

«ساباھ» گېزىتى: «تۈركىيە ھاۋا يوللىرى شىركىتى كۈنىگە ئوتتۇرىچە 603 نۆۋەتچى ئايروپىلان قاتنىشى بىلەن ياۋروپادىكى ئۈستۈنلۈكىنى ساقلاپ قالدى» سەرلەۋھىلىك خەۋىرىدە، ياۋروپا ئاۋىياتسىيە قاتناش بىخەتەرلىكى تەشكىلاتىنىڭ 18 - فېۋرالدىن 24 - فېۋرالغىچە بولغان جەرياندىكى ئاۋىياتسىيە قاتنىشى دوكلاتىغا ئاساسلانغاندا، تۈركىيە ھاۋا يوللىرى شىركىتى (THY) نىڭ كۈنىگە ئوتتۇرىچە 603 نۆۋەتچى ئايروپىلان قاتنىتىپ، ياۋروپادىكى رەقىبلىرىدىن ئېشىپ كەتكەنلىكى توغرىسىدىكى ئۇچۇرلارنى ئوقۇرمەنلىرىنىڭ دىققىتىگە سۇندى.

«خابەرتۈرك» گېزىتى: «گۈل ئېكسپورتى %19 ئاشتى» سەرلەۋھىلىك خەۋىرىدە، تۈركىيەنىڭ 2021 - يىلى 1 - يانۋاردىن 21 – فېۋرالغىچە بولغان ئارىلىقتىكى گۈل ئېكسپورتىنىڭ بۇلتۇرقىنىڭ ئوخشاش مەزگىلىگە سېلىشتۇرغاندا %19 ئېشىپ،  23 مىليون 752 مىڭ دوللارغا يەتكەنلىكىنى يازدى.

«ۋەتەن» گېزىتى: «تۈركىيە چاقماق تېزلىكىدە ھەرىكەتكە ئۆتتى! تۇنجى بولۇپ تۈركىيەدە ئوتتۇرىغا چىقتى، كىشىلەرنىڭ دىققىتىنى تارتتى...» سەرلەۋھىلىك خەۋىرىدە، (تۈركىيە جۇمھۇرىيىتى) جۇمھۇر رەئىسلىك مەھكىمىسى مۇداپىئە سانائىتى ئىدارىسى تۈرى بىلەن تۈركىيە ئاۋىياتسىيە ۋە ئالەم قاتنىشى سانائىتى شىركىتى (TUSAŞ) تەرىپىدىن ئىشلەپچىقىرىلغان «ئاتاك» ناملىق تىك ئۇچار ئايروپىلاننىڭ تۇنجىسى مۇراسىم بىلەن جامائەت خەۋپسىزلىك باش ئىدارىسىگە ئۆتكۈزۈپ بېرىلگەنلىكىنى؛ جۇمھۇر رەئىسلىك مەھكىمىسى مۇداپىئە سانائىتى ئىدارىسى رەئىسى ئىسمائىل دەمىرنىڭ، 2 - باسقۇچلۇق سەپلەش خىزمەتلىرى نەتىجىسىدە ئاتاك تىك ئۇچار ئايروپىلانىنىڭ ئېلېكتىرونلۇق ئۇرۇش ۋە تاقابىل تۇرۇش ئىقتىدارىنىڭ ئەڭ يۇقىرى سەۋىيەگە يەتكەنلىكىنى ئېيتقانلىقى توغرىسىدىكى ئۇچۇرلارغا ئورۇن بەردى.