14.08.2020

bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:

1472729
14.08.2020

türkiye awazi radiyosi: «sabah» géziti, «erdoghanning <sherqiy aqdéngiz> pozitsiyesi» serlewhilik xewiride, jumhur reis rejep tayyip erdoghanning tünügün adalet we tereqqiyat partiyesining wilayet derijilik bashliqliri yighinidiki sözi jeryanida sherqiy aqdéngiz (sherqiy ottura déngiz) detalashliri toghrisida toxtilip, «paaliyet sahelirimiz déngizdiki salahiyet sahelirimizdur, hemme xatirjem bolsun. héchkimning heqqide nezirimiz bolmighinidek, héchkimgimu heqqimizni yégüzmeymiz. oyun körsitishning koyida bolmasliq kérek» dégenlikini oqurmenliri bilen ortaqlashti.

«star» géziti, «türkiye roshen signal (berdi): héchkimning shübhisi bolmisun» serlewhilik xewiride, (türkiye jumhuriyiti) mudapie ministiri xulusi aqar tünügün ezerbeyjanda bayanat bérip, «shuni nahayiti éniq otturigha qoyimenki, ötken yillarda xojalida pütkül dunyaning köz aldida irqiy qirghinchiliq qilghan, üstün qarabaghni héchqandaq qanuniy sewebke tayanmastin ishghal qiliwalghan erméniyege qarshi pütkül imkaniyetlirimiz bilen ezerbeyjanning, ezerbeyjanliq sepdashlirimizning adaqqiche yénida turimiz» dégenlikini yazdi.

«xabertürk» géziti, «ministir pekjan: liwiye bilen bolghan munasiwetlirimiz nuqtisidin nahayiti muhim bir höjjetni imzaliduq (dédi)» serlewhilik xewiride, türkiye bilen liwiye otturisida türkiye shirketlirining liwiyede emelge ashuruwatqan türlerde duch kelgen mesililerni hel qilish we yérim qalghan qurulush höddigerliki türlirini dawamlashturush toghrisida ramka kélishimining imzalanghanliqini, soda ministiri ruhsar pekjanning bu heqte toxtilip, «türkiye bilen liwiye otturisida iqtisad we soda munasiwetlirimiz üchün nahayiti muhim bolghan bir kélishimni imzaliduq» dégenlikini qeyt qildi.

«weten» géziti, «bu robot qizitmini ölcheydu, dizinféksiye dorisi pürküydu, maska béridu» serlewhilik xewiride, ordudiki doktor m.hilmi güler ilim – pen we senet merkizide wezipe öteydighan 6 oqutquchi, wuxen wirusi (kowid – 19) din qoghdinish tedbirliri dairiside qizitmini ölchigendin kéyin, dizinféksiye suyuqluqi pürküp maska béridighan bir robot (mashina adem) yasap chiqqanliqini yazdi. xewerde körsitilishiche, robot aldi bilen binagha kiridighan kishining qizitmisini ölcheydiken, arqidin dizinféksiye suyuqluqi pürküp maska béridiken؛ qizitmisi töwen kishilerge ishikni aptomatik échip béridighan robot, qizitmisi yuqiri kishige ishikni achmasliq bilenla qalmay, munasiwetlik kishige weqe heqqide uchur yollaydiken. «hörriyet» géziti, «türkiyening ögzisi qutup we chöl kilimatini birlikte bashtin kechürmekte» serlewhilik xewiride, türkiyening déngiz yüzidin eng égiz nuqtisi bolghanliqi üchün «türkiyening ögzisi» dep atiliwatqan aghri téghida chöl we qutup hawasining birlikte körülüwatqanliqini؛ taghning étikide hawaning issiq ikenlikini, her ming métirda hawa témpératurasining özgirip bahar we küz aylirini eslitiwatqanliqini yazdi.

xewerde körsitilishiche, türkiyening eng égiz nuqtisi bolghan we témpératura nöldin töwen 20 giradusqiche chüshidighan aghri téghining choqqisida bolsa, awghust éyida qish hawasi bar iken.



مۇناسىۋەتلىك خەۋەرلەر