26.06.2020
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
türkiye awazi radiyosi: «yéngi shepeq» géziti, «jumhur reis erdoghan, koréye urushining 70 – yilida shéhit we ghazilarni séghinish ichide eslidi» serlewhilik xewiride, jumhur reis rejep tayyip erdoghanning, koréye urushining 70 yilliqi munasiwiti bilen jenubiy koréyede ötküzülgen murasimigha yollighan sin körünüshlük télégrammisida «biz koréye urushining 70 yilliqini xatirilewatqan bu tarixiy künde eziz shéhitlirimizni séghinish, ghazilirimizni minnetdarliq ichide esleymen» dégen ibarilerge orun bergenlikini oqurmenliri bilen ortaqlashti.
«hörriyet» géziti, «türkiye amérika qoshma ishtatlirining <térrorizm doklati> gha naraziliq bildürdi» serlewhilik xewiride, (türkiye jumhuriyiti) tashqi ishlar ministirliqi bayanatchisi hami aqsoyning amérika tashqi ishlar ministirliqining 2019 – yilliq doklatigha naraziliq bildürüp, «doklatta, dölitimizning y p g ni p k k ning süriyediki qaniti dep qaraydighanliqi eskertilip, y p g ning p k k bilen bir térrorluq teshkilati ikenlikining üstige ton yépishqa tirishilmaqta. bu pozitsiye y p g ning térrorchi kimlikining ochuq – ashkara tekitlinishidin özini qachurush dégenliktur, téximu yamini amérikaning bu térrorluq teshkilati bilen bolghan hemkarliqini jezmleshtürmekte» dégen sözlirige orun berdi.
«sabah» géziti, «jumhur reislik mehkimisi bayanatchisi ibrahim qalin liwiye toghrisida bayanat berdi» serlewhilik xewiride, jumhur reislik mehkimisi bayanatchisi ibrahim qalinning, liwiyening nöwettiki weziyiti toghrisida bayanat bérip, isyanchi hafterning nahayiti éghir talapetke uchrighanliqini bildürgen halda «firansiye qollighan hafter xeterlik oyun oynimaqta» dégen sözlirige orun berdi.
«xabertürk» géziti, «ministir warank: bir qanche ay ichide xushxewerlerni bérishimiz mumkin» serlewhilik xewiride, sanaet we téxnologiye ishliri ministiri mustafa warankning wuxen wirusi (kowid – 19) gha qarshi küresh toghrisida toxtilip, waksinilarni haywanlarda sinaq qilish xizmetlirining téz sürette dawamlishiwatqanliqigha isharet qilghan halda, «aldimizdiki bir qanche ay ichide xushxewerlerni bérishimiz mumkin» dégenlikini yazdi.
«weten» géziti, «türkiye bilen ukraina arisidiki awiyatsiye qatnishi 1 – iyulda bashlinidu» serlewhilik xewiride, ukraina pirézidénti wiladimir zélénskiyning, türkiye bilen ukraina arisidiki bir qisim awiyatsiye qatnishining 1 – iyulda bashlinidighanliqini bildürüp, «buning sayahet sahesige küch béghishlaydighanliqi toghrisida türkiye jumhuriyiti jumhur reisi rejep tayyip erdoghanning pikirige qoshulimen» dégenlikini oqurmenliri bilen ortaqlashti.
