22.05.2020
bügünki türkiye metbuatliridin tallap teyyarlanghan xewerlirimizning qisqiche mezmunliri töwendikiche:
türkiye awazi radiyosi: «hörriyet» géziti, «jumhur reis erdoghan ghayet chong doxturxanining échilishida muhim sözlerni qildi» serlewhilik xewiride, istanbul bashaqshehir cham we sakura doxturxanisining tünügün xizmetke kirishtürülgenliki, échilish murasimida söz qilghan jumhur reis erdoghanning «bu yerde saghlamliq sayahetchilikide türkiyening marka orunlirining biri bolidu. xelqimizge we istanbul ayrodurumigha bolghan yéqinliqi tüpeyli chet ellik méhmanlirimizghimu mulazimet qilidu. bu, istanbulning bir xelqara saghlamliq merkizige aylanghanliqidin dérek béridu» dégenlikini oqurmenliri bilen ortaqlashti.
«sabah» géziti, «uchur – alaqe ishliri bashliqi altun washington waqti gézitigha yazdi» serlewhilik xewiride, jumhur reislik mehkimisi uchur – alaqe ishliri idarisi bashliqi fahrettin altunning «washington pochtisi géziti» üchün «türkiyening istratégiyesi korona wirus yuqumining yönilishini özgertti» dégen témida maqale yézip, türkiyening wuxen wirusigha taqabil turush kürishini bayan qilip, «biz sehiye sahesidiki islahat we sélinmilirimiz arqiliq nurghun kishilerning saghlamliq xizmetliridin paydilinishining yolini achtuq. netijide sehiye sistémimiz bashqa döletlerdikige oxshash éghir bésimgha duch kelmidi» dégenlerni qeyt qilghanliqini yazdi.
«xabertürk» géziti, «tashqi ishlar ministirliqi hafterge naraziliq bildürdi» serlewhilik xewiride, (türkiye jumhuriyiti) tashqi ishlar ministirliqi bayanatchisi hami aqsoyning, liwiyediki türkiye menpeetlirige ziyan yetküzülgen teqdirde, buning nahayiti éghir aqiwetlerni keltürüp chiqiridighanliqini bildürüp, «isyanchi hafter unsurlirini yolluq zerbe nishani dep qaraydighanliqimizni yene bir qétim eslitip ötimiz» dégenlikini oqurmenlirining diqqitige sundi.
«weten» géziti, «türkiye bilen girétsiye otturisida hemkarliq» serlewhilik xewiride, (türkiye jumhuriyiti) medeniyet we sayahet ministirliqining, wuxen wirusigha taqabil turushta normallishish basquchi qedemlirining tashlinishidin kéyin eng köp sayahetchi yollaydighan döletler bilen alaqini kücheytishke bashliqini yazdi.
xewerde, medeniyet we sayahet ishliri ministiri mehmet ersoyning girétsiye sayahet ishliri ministiri xaris téoxaris bilen körüshüp, ege déngizining bixeter liniye süpitide aldinqi pilangha chiqirilishi toghrisida sözliship, ortaq tonutush seperwerliki qozghashni qarar qilghanliqi qeyt qilindi.
«star» géziti, «marmarayni bésip ötidighan tunji éksport poyizi sakaryadin yolgha chiqidu» serlewhilik xewiride, türkiyede ishlepchiqirilghan aptomobil zapchasliri we éléktronluq öy eshyaliri yüklengen marmaraydin ötidighan tunji éksport poyizining sakaryaning arifiye poyiz istansisidin qozghalghanliqini, yüz yilning türi – marmarayni bésip ötüp biwasite yawropagha baridighan poyizning anadoludin yawropagha yétip barghan tunji mexsus éksport poyizi bolidighanliqini yazdi.
