26.02.2020

бүгүнки түркийә гезитлиридә асасий салмақни игилигән хәвәрлиримиз төвәндикичә:

26.02.2020

түркийә авази радийоси: «‹стар› гезити», «әрдоған нишанлириниң әзәрбәйҗан билән болған сода омумий соммисини 15 милйард долларға йәткүзш икәнликини ейтти» сәрләвһилик хәвиридә, төвәндики мәлуматларни оқурмәнлириниң диққитигә сунди:

җумһур рәис рәҗәп таййип әрдоған әзәрбәйҗанниң пайтәхти бакуда пирезидент илһам әлийев билән елип барған учришишида, түркийә – әзәрбәйҗан мунасивәтлири һәққидә кәң даирилик музакириләрни елип барғанлиқлирини,  әзәрбәйҗан билән ишқа ашурулуватқан сода омумий соммисиниң 2019 – йили 4 йерим милйард доллар болғанлиқини, нишанлириниң,  бу рәқәмни 2020 – йили 15 милйард долларға  йәткүзүш икәнликини ейтти.

«‹йеңи шәпәқ› гезити», «түркийә шималий атлантик әһди тәшкилатиниң <Dynamic Manta 2020 >һәрбий манивериға мөһирини басти» сәрләвһилик хәвиридә, төвәндики мәлуматларға орун аҗратти:

шималий атлантик әһди тәшкилатиниң су асти парахотлириға қарши һава, су үсти вә деңиз  астидикий һәмкарлиқни күчәйтиш, урушқа тәййар һаләттә турушни нишан қилидиған  « Dynamic Manta-2020» һәрбий манивери башланди.

йеқиндин буйан шәрқий ақдеңиз вә оттура ақдеңизда миллий қоманданлиқ нами астида 10 уруш парахоти билән  вәзипә өтәватқан, түркийәниң миллий һәқ – һоқуқлири һәм мәнпәәтлири бар җайларда түркийә байриқини ләпилдитиватқан түркийә деңиз армийәси, шималий атлантик әһди тәшкилати һәрбий маниверлирини әң көп қоллиған деңиз армийәлири қатаридин орун алидиған болуп, бу қетимқи манивердиму мәвҗудитини күчлүк шәкилдә һес қилдурмақта.

«‹сабаһ› гезити», «түркийә идлибқа давамлиқ танкилар вә шрапнел атидиған зәмбирәкләрни йоллимақта» сәрләвһилик хәвиридә, төвәндики учурларни оқурмәнлириниң диққитигә сунди:

түркийә армийәси тәрипидин дөлитимизниң һәрқайси җайлиридидин әвәтилгән тәхминән 20 йүк аптомобиллиқ шрапнел атидиған зәмбирәк вә 10 танкидин тәшкил тапқан һәрбий аптомобил әтрити сүрийә чеграсиға әвәтилди. әтрәт сүрийә чеграсидин өтүп, идлибқа йетип барғандин кейин, бу йәрдики  көзитиш нуқтилириға орунлаштурулиду.

сүрийә чеграсиға һәрбий әслиһәләрниң давамлиқ әвәтилиши күтүлмәктә.

«‹һөрийәт› гезити», «түркийә  бордин литий ишләпчиқириду» сәрләвһилик хәвиридә, төвәндики байанларға орун аҗратти:

енергийә вә тәбиий байлиқлар министири фатиһ дөнмәз, түркийәниң дунйа бойичә бор записиниң % 70 гә игә бир дөләт икәнликини, борниң ичидә литей барлиқини тәкитләп мундақ деди: «ток аптомобиллириниң әң һалқилиқ нуқтиси батарийәдур. литий батарейәсиму бу йәрдә алдинқи пиланға чиқиду. шуңа, борниң ичидики литейни айрип ишлитимиз. бу йилниң ахирлириғичә бордин литей ишләпчиқиридиған муәссәсә тәсис қилишни пиланлаватимиз.»

«‹хәвәр түрк› гезити», «түркийә һава йоллири ширкити хитайға қарита айропилан сәпәрлири һәққидә байанат елан  қилди» сәрләвһилик хәвиридә, төвәндики мәлуматларға орун аҗратти:

түркийә һава йоллири ширкити хитайға ишқа ашурулуватқан айропилан сәпәрлириниң 28  февралғичә тохтитилғанлиқини җакарлиди. иранниң пайтәхти теһранға ишқа ашурулуватқан айропилан сәпәрлириниңму 10 мартқичә бикар қилинғанлиқини уқтурди.



مۇناسىۋەتلىك خەۋەرلەر