21.02.2020

бүгүнки түркийә гезитлиридин таллап тәййарлиған хәвәрлиримизниң қисқичә мәзмунлири төвәндикичә:

21.02.2020

түркийә авази радийоси: «<һөррийәт> гезити», «әрдоған германийәдики һуҗум тоғрисида байанат бәрди» сәрләвһилик хәвиридә, җумһур рәис рәҗәп таййип әрдоғанниң милләт кутубханисиниң ечилиш мурасимида сөз қилип, германийәниң ханау шәһирики икки қәһвәханида йүз берип, түркләрни өз ичигә алған көп санда адәмниң өлүмини кәлтүрүп чиқарған һуҗум  тоғрисида «барлиқ мунасивәтлик органлиримиз бу мусапини сәзгүрлүк билән көзәтмәктә. германийә даирилириниң һуҗумни айдиңлитиш үчүн қолидин келишичә тиришчанлиқ көрситидиғанлиқиға ишинимән» дегәнликини йазди.

«<сабаһ> гезити», «нато түркийәни қоллап видео (тарқатти)» сәрләвһилик хәвиридә, шималий атлантик әһди тәшкилати – натониң, түркийәниң натоға қошқан төһпилирини қисқа филим һалитидә тәййарлап, өзиниң тивиттердики адресида тарқатқанлиқини, филимдә уруш айропилани учқучиси әсра өзатайниң тилидин түркийәниң натоға қошқан пәрқлиқ төһпилириниң байан қилинғанлиқи тоғрисидики учурларни оқурмәнлири билән ортақлашти.

«<вәтән> гезити», «хәзинә вә малийә ишлири министири бәрат албайрақ: киризис ашиқлирини мәйүсләндүрдуқ (деди)» сәрләвһилик хәвиридә, хәзинә вә малийә ишлири министири бәрат албайрақниң, пул пахаллиқи, ташқи перевот вә өсүмдә еһтимал дәпму қаралмиған дәриҗидә йахшилиниш болғанлиқини әскәрткәнликини йазди. гезитиниң хәвиридә көрситилишичә, түнүгүн ғазиантәптә сода – санаәтчиләргә хитаб қилған албайрақ, йолға қойған тәдбирләр сайисида, иқтисадқа алақидар барлиқ органлар намайан қилған күчлүк кординатсийә вә сода – санаәт дунйасиниң йеқиндин қоллап – қуввәтлиши билән киризис ашиқлириниң мәйүсләндүрүлгәнликини ейтқан.

«<йеңи шәпәқ> гезити», «русийәдин 6 милйон, германийәдин 3 милйон сайаһәтчиниң келиши күтүлмәктә» сәрләвһилик хәвиридә, бултур русийәдин 5 йерим милйон, германийәдин 2 милйон 600 миң сайаһәтчи кәлгән анталйаниң, алдин закас қилиш учурлириға асасән икки асасий базардики пейини ашурушни көзләватқанлиқини йазди. хәвәрдә, ақдеңиз сайаһәт меһманханилири вә башқурғучилири бирлики башлиқи әркан йағҗиниң «бултур йанвар ейида русийәдин 37314, германийәдин 29607 киши кәлди. бу йил охшаш мәзгилдә русийәдин кәлгән сайаһәтчи сани 57177, германийәдин кәлгән сайаһәтчи сани 40669 ға йәтти» дегәнлики қәйт қилинди.

«<хабәртүрк> гезити», «чанаққәлә көврүки қәдәмму қәдәм пүтүшкә йеқинлашмақта» сәрләвһилик хәвиридә, 2017 – йили 18 – мартта ули селинған, икки асасий түврүк арилиқи түркийә җумһурийити қурулғанлиқиниң 100 йиллиқини ипадиләш мәқситидә 2023 метир қилип пиланланған «1915 – йил чанаққәлә көврүки» ниң йавропа вә анадолу тәрәплиридики деңиз ичи вә қуруқлуқ хизмәтлириниң тохтавсиз давамлишиватқанлиқини, пүткән чеғида дунйаниң әң чоң вә оттура дәриҗилик узунлуқтики асма көврүки унваниға игә болидиғанлиқи тоғрисидики учурларни оқурмәнлири билән ортақлашти.



مۇناسىۋەتلىك خەۋەرلەر