14.02.2020

bügünki türkiye gézitliridin tallap teyyarlighan xewerlirimizning qisqiche mezmunliri töwendikiche:

14.02.2020

türkiye awazi radiyosi: «<star> géziti», «jumhur reis erdoghan shimaliy makédoniyede <eng yaxshi körülidighan dunya lidéri> boldi» serlewhilik xewiride, jumhur reis rejep tayyip erdoghanning shimaliy makédoniyede élip bérilghan bir elrayini sinash netijisige asasen, «eng yaxshi körülidighan dunya lidéri» tizimlikining birinchi rétidin orun alghanliqi, awaz qatnashturghuchilarning %60 ining jumhur reis erdoghan toghrisida ijabiy qarash bayan qilghanliqi toghrisidiki uchurlarni oqurmenliri bilen ortaqlashti.

«<yéngi shepeq> géziti», «aqar: zapas qisimlarni ewetiwatimiz, saheni kontrol qilimiz (dédi)» serlewhilik xewiride, (türkiye jumhuriyiti) dölet mudapie ministiri xulusi aqarning, shimaliy atlantik ehdi teshkilati – nato yighinigha ishtirak qilishi üchün barghan bélgiyening paytexti biryussélda süriyening idlib rayonidiki hujumlar toghrisida toxtilip, «(idlib) urush toxtitishni kapaletke ige qilish we uni daimiyliqqa ige qilish üchün zapas qisimlarni ewetiwatimiz, saheni kontrol qilimiz. idlibta ashqunlarni öz ichige alghan urush toxtitish kélishimige riaye qilmighanlargha qarita küch ishlitidu, hertürlük chare – tedbirler yolgha qoyulidu» dégenlikini yazdi.

«<sabah> géziti», «21 ayning rékortini yaratti» serlewhilik xewiride, sanaet we téxnologiye ishliri ministiri mustafa warankning, dékabir éyida sanaet ishlepchiqirishining yilliq %8.6 ashqanliqini eskertip, «21 ayning rékortini yaratti! bu haletni izchilliqqa ige qilishqa, ishlepchiqirish merkezlik (iqtisadiy) güllinishke merkezleshtuq. güllinish süriti ashqan, ishlepchiqirish sahesi kücheygen, ishqa orunlashturush nisbiti örligen bir yil üchün küch chiqiriwatimiz» dégenlikini oqurmenliri bilen ortaqlashti.

«<weten> géziti», «istanbul ayrodurumida bowaq harwisi heqsiz» serlewhilik xewiride, istanbul ayrodurumining dölet ichi – sirti kélip – kétish béketliride, bowaq harwilirida 0 – 6 yash arisida perzentliri bar aililerning heqsiz ishlitishige sunulghanliqi toghrisidiki uchurlarni oqurmenliri bilen ortaqlashti.

«<hörriyet> géziti», «qanunsiz yollar bilen chiqirilghan 2 yadikarliq türkiyege keltürülidu» serlewhilik xewiride, medeniyet we sayahet ishliri ministirliqining qanunsiz yollar bilen chégra sirtigha chiqirilghan ispartagha mensup sidamara tipidiki qebre téshi bilen miladidin burunqi 2 – 3 minginchi yillargha mensup harwa modéli yadikarliqining 15 – féwralda engliyedin türkiyege keltürülidighanliqining élan qilinghanliqini yazdi.


خەتكۈچ: uyghurche , metbuat , gézit , türkiye

مۇناسىۋەتلىك خەۋەرلەر