24.01.2020

türkiye awazi radiyosi: «<xabertürk> géziti», «chawushoghlu: urush toxtitish dawamlishidighanla bolsa, liwiye qoshumche esker ewetilmeydu (dédi)» serlewhilik xewiride, dölitimiz (türkiye jumhuriyiti) tashqi ishlar ministiri mewlüt chawushoghluning, liwiyede urush toxtitish kélishimige riaye qilinidighanla bolsa, türkiyening bu döletke zapas esker ewetmeydighanliqini éytqanliqini yazdi. xewerde körsitilishiche, liwiyediki eng muhim shertning toqunushlarning toxtitishi ikenlikini tekitligen chawushoghlu, diqqetlirini liwiye mesilisige siyasiy chare tépishqa merkezleshtüridighanliqlirini bildürgen.

«<yéngi shepeq> géziti», «hafterning yoluchilar ayropilanlirini étip chüshürüsh toghrisidiki tehditi türkiyening qolini küchlendüridu» serlewhilik xewiride, liwiyede mitiga ayrodurumini grad namliq bashqurulidighan bombilarni ishlitip bordiman qilghan hafter küchlirining, tiripoligha yéqinlashqan yoluchilar ayropilanlirini étip chüshüridighanliqini éytip tehdit salghanliqini yazdi. gézitining xewiride körsitilishiche, mezkur bayanatlarning türkiyege nisbten küchlük kozir bolidighanliqini bildürgen dem élishqa chiqqan uchquchi birigada générali beyazit qaratash, «türkiye, liwiye hawa mudapie sistémilirini yollidi. türkiye hawa armiyesi hafter küchlirini erkin – azade halda bombardiman qilalighudek küchke ige. buningdin kéyinki ishlargha urush toxtitishni xalimighan hafter bash qatursun» dégen.

«<star> géziti», «stolténbérg: türkiyening nato ezaliqining ehmiyitini chüshinishke mejburmiz (dédi)» serlewhilik xewiride, shimaliy atlantik ehdi teshkilati – nato bash katipi yéns stolténbérgning, türkiyening nahayiti muhim bir nato ittipaqdishi ikenlikini eskertip, « türkiyening nato ezaliqining ehmiyitini chüshinishke mejburmiz» dégenlikini yazdi. xewerde körsitilishiche, yéns stolténbérg, «türkiye bir qanche jehettin nahayiti muhim bir nato ittipaqdishi. natoning wezipe we heriketlirige hesse qoshup kéliwatqan türkiye, eyni waqitta daésh üstidin qolgha keltürülgen utuqta nahayiti muhim rol oynidi» dégen.

«<hörriyet> géziti», «türkiyening 2019 – yilidiki mudapie we awiyatsiye éksporti 2 milyard 400 milyon dollargha yetti» serlewhilik xewiride, türkiyening 2019 – yili mudapie we awiyatsiye sahesidiki éksportining bulturqining oxshash mezgilige sélishturghanda %35 éship, 2 milyard 400 milyon dollargha yetkenlikini yazdi. gézitining xewiride körsitilishiche, türkiyede mudapie we awiyatsiye sahesi sanaitide 50 minggha yéqin adem xizmet qilidiken. türkiye kélechekning urush ayropilani, uzun musapilik hawa mudapie sistémiliri, süniy hemrah we süniy hemrah qoyup bérish sistémiliri dégendek sahelerde mehsulat ishlepchiqirishni dawamlashturuwatqan bolup, dunyadiki chong shirketler bilen riqabetlisheligüdek mehsulatlarni otturigha chiqarmaqta iken.

«<weten> géziti», «berat albayraq: türkiye iqtisadiy jehette küchlük özgirish basquchini bashtin kechürdi (dédi)» serlewhilik xewiride, xezine we maliye ishliri ministiri berat albayraqning, türkiyening ishlepchiqirish jehette ijadkar, teshebbuskar xaraktérdiki xususiy igiliktiki shirketlerge ige ikenlikini eskertkenlikini yazdi. xewerde, yéngi (iqtisadiy) sistémining ünümining yaxshi bolghanliqini bildürgen albayraqning, ösüm nisbiti we pul paxalliqining töwenlishidimu buning ipadilengenlikini éytqanliqi qeyt qilindi. xewerde körsitilishiche, albayraq, türkiye merkiziy bankisining amérika merkiziy bankisigha oxshashla musteqil ikenlikini eskertken.