21.01.2020

бүгүнки түркийә гезитлиридә асасий салмақни игилигән хәвәрлиримиз төвәндикичә:

21.01.2020

түркийә авази радийоси: «сабаһ гезити»,  түркийә җумһур рәиси рәҗәп таййип әрдоған түркийәниң ливийәдики мәвҗудийитиниң тинчлиқ үмидлирини ашурғанлиқини ейтқанлиқини хәвәр қилди.

хәвәрдә, җумһур рәис рәҗәп таййип әрдоғанниң германийәдики учришишлирини ахирлаштуруп, қайтиш сәпиридә айропиланда мухбирларға бәргән байанатида, берлиндики ливийә конферанси үстидә тохтилип: «биз күчлүк дөләт, шуңа биздин нурғун үмид күтүшләр болиду. түркийә тинчлиқниң ачқучидур. ливийә мәсилисидә басқан қәдәмлиримиз, мусапини тәңпуңлаштурди. буниңдин кейин, һәм әмәлийитимиздә һәмдә үстәлдә сийасий мусапини қоллашни давамлаштуримиз» дегәнлики қәйт қилинди.

«йеңи шәпәқ гезити», җумһур рәислик сарийи байанатчиси ибраһим калинниң түнүгүн (20-йанвар) берлиндә чақирилған ливийә йиғини тоғрисида байанат елан қилғанлиқини хәвәр қилди.

хәвәрдә, ибраһим калинниң, «берлин конферанси ливийәдә тоқунушларниң ахирлишиши вә мәсилини сийасий йол билән һәл қилиш үчүн муһим пурсәт. җумһур рәис рәҗәп таййип әрдоғанниң тәсири күчлүк вә көп йөнүлүшлүк дипломатийәси, түркийәни мәсилини һәл қилиш мусаписиниң ачқучлуқ актийорлиридин биригә айландурди» дегәнлики қәйт қилинди.

«хәбәр түрк гезити», хәзинә вә малийә ишлири министири бәрат албайракниң 2019-йиллиқ доклат бериш йиғинида, 2020-йилиниң наһайити инчикә пиланланған йил болидиғанлиқини билдүрүп: «2020-йили пул пахаллиқи бир ханлиқ санға чүшкән йил болиду» дегәнлики әскәртилди.

«һөррийәт гезити», 2019-йили истанбул, анталйа вә әнқәрәниң, чәт әлликләргә әң көп өй сетилған шәһәрләр болғанлиқини елан қилди.

хәвәрдә, 2019-йилида истанбулдики өй сетиш нисбитини2018-йилиға селиштурғанда, %46.2 ешип 20 миң 857 гә йәткәнлики, анталйада болса, бу санниң 8 миң 951, әнқәрәдә 2 миң 539 ға йәткәнлики билдүрүлди.

«стар гезити», бу йил (2020) «текнофәст» (TEKNOFEST) фестивалиниң, миллий күрәшниң ғази шәһири ғазиантәптә өткүзүлидиғанлиқини елан қилди.

хәвәрдә, икки йилдин буйан рекорт йаритиватқан дунйадики әң чоң авийатсийә, аләм қатниши вә технологийә фестивали текнофәстниң 22-сентәбирдин 27-сентәбиргичә ғазиантәп айродурумида өткүзүлидиғанлиқи билдүрүлди.


خەتكۈچ: стар , сабаһ

مۇناسىۋەتلىك خەۋەرلەر