14.01.2020

bügünki türkiye gézitliride asasiy salmaqni igiligen xewerlirimiz töwendikiche:

14.01.2020

türkiye awazi radiyosi: «‹weten› géziti», «jumhur reis erdoghan gérmaniyede dölet ishliri ziyaritide bolidu» serlewhilik xewiride, töwendiki melumatlarni oqurmenlirining diqqitige sundi:

jumhur reis rejep tayyip erdoghan «bérlin konféransi» gha qatnishish üchün 19 – yanwar küni gérmaniyening paytexti bérlingha baridu. türkiyening tirishchanliq körsitishi netijiside liwiyede hasil qilinghan urush toxtitish kélishimi we sherqiy aqdéngizdiki özgirishler konféransning muhim küntertip maddilirini teshkil qilidu.

konféransqa ishtirak qilghuchi döletler, urush toxtitish kélishimining  uzaq mezgillik bolushi we liwiye kirizisini siyasiy yollar arqiliq hel qilish izdinishliri dairiside özara pikir almashturidu.

«‹xewer türk› géziti»,   «chet elliklerning diqqiti  qanal istanbulgha merkezleshmekte» serlewhilik xewiride, töwendiki melumatlargha orun ajratti:  

qatnash we qurulush ishliri ministiri jahit turhan, qanal istanbuldin ötidighan paraxotlardin élinidighan yilliq eng töwen baj miqdarining 1 milyard dollar etrapida bolidighanliqini eskertish bilen bir waqitta, gollandiye, bélgiye we firansiye shirketlirining qanal istanbul layihesige intayin köngül bölüwatqanliqini tekitlidi.

u yene, «istanbul boghuzi» ning xelqaraliq déngiz tiransportida ishlitiliwatqan birdinbir su yoli bolghanliqi üchün qatnash qistangchiliqigha duch kéliwatqanliqini, shunga «qanal istanbul» gha éhtiyaj chüshüwatqanliqinimu sözlirige ilawe qildi.

«‹yéngi shepeq› géziti», «12 – ayliq éshincha 2 milyard 725 milyon dollargha yetti»  serlewhilik xewiride, töwendiki uchurlarni oqurmenlirining diqqitige sundi:

2019 – yili noyabirda qerelsiz amanet hésabatlirida 518 milyon dollarliq qizil reqem körülgen bolsimu, lékin yéqinda élan qilinghan uchurlar bilen birlikte, 12 ayliq éshincha 2 milyard 725 milyon dollargha yetti. sayahet sahesidin kirgen kirim, 2018 – yilning noyabir éyigha sélishturghanda 177 milyon dollar éship, 1 milyard 414 milyon dollargha yetti.

«‹sabah› géziti», «borsa istanbul  ösümni bir xanigha chüshürüsh menzilgahigha qarap ilgirilimekte» serlewhilik xewiride, töwendiki bayanlargha orun ajratti:

pul – muamile bazarlirida aldinqi hepte bashlanghan yaxshi weziyet dawamlashmaqta. borsa istanbul aridin 2 yil ötkendin kéyin 120 ming reqimidin halqip ketti. buninggha egiship, ösüm nisbiti % 10.72 bilen 2017 – yili yanwardin buyanqi eng töwen sewiyege chüshti. türkiyening xewp – xeter perqimu 20 ayning eng töwen sewiyesige chüshti.

«‹star› géziti», «soda ishliri ministiri ruhsar pekjanning afriqa sepiri» serlewhilik xewiride, töwendiki melumatlarni oqurmenlirining diqqitige sundi:

soda ishliri ministiri ruhsar pekjan bashchiliqidiki heyet bügün nigériyede ziyarette bolidu, hemde bu dairide yéngi hemkarliq ornitish imkaniyetliri üstide izdinidu.

nigériyening paytexti abujagha qilidighan ziyaritide, afriqa elliri bilen soda hem sélinma alaqisi bar türk karxanichilarmu ministir pekjangha hemrah bolidu. pekjan nigériyediki ziyaritini tamamlighandin kéyin, 15 – yanwar küni marakesh – türkiye sélinma we soda – iqtisad munbiri hemde marakesh – türkiye ortaq komitéti yighinigha qatnishish üchün marakeshning paytexti rabatqa ötidu.



مۇناسىۋەتلىك خەۋەرلەر