14.01.2020

бүгүнки түркийә гезитлиридә асасий салмақни игилигән хәвәрлиримиз төвәндикичә:

14.01.2020

түркийә авази радийоси: «‹вәтән› гезити», «җумһур рәис әрдоған германийәдә дөләт ишлири зийаритидә болиду» сәрләвһилик хәвиридә, төвәндики мәлуматларни оқурмәнлириниң диққитигә сунди:

җумһур рәис рәҗәп таййип әрдоған «берлин конферанси» ға қатнишиш үчүн 19 – йанвар күни германийәниң пайтәхти берлинға бариду. түркийәниң тиришчанлиқ көрситиши нәтиҗисидә ливийәдә һасил қилинған уруш тохтитиш келишими вә шәрқий ақдеңиздики өзгиришләр конферансниң муһим күнтәртип маддилирини тәшкил қилиду.

конферансқа иштирак қилғучи дөләтләр, уруш тохтитиш келишиминиң  узақ мәзгиллик болуши вә ливийә киризисини сийасий йоллар арқилиқ һәл қилиш издинишлири даирисидә өзара пикир алмаштуриду.

«‹хәвәр түрк› гезити»,   «чәт әлликләрниң диққити  қанал истанбулға мәркәзләшмәктә» сәрләвһилик хәвиридә, төвәндики мәлуматларға орун аҗратти:  

қатнаш вә қурулуш ишлири министири җаһит турһан, қанал истанбулдин өтидиған парахотлардин елинидиған йиллиқ әң төвән баҗ миқдариниң 1 милйард доллар әтрапида болидиғанлиқини әскәртиш билән бир вақитта, голландийә, белгийә вә фирансийә ширкәтлириниң қанал истанбул лайиһәсигә интайин көңүл бөлүватқанлиқини тәкитлиди.

у йәнә, «истанбул боғузи» ниң хәлқаралиқ деңиз тиранспортида ишлитиливатқан бирдинбир су йоли болғанлиқи үчүн қатнаш қистаңчилиқиға дуч келиватқанлиқини, шуңа «қанал истанбул» ға еһтийаҗ чүшүватқанлиқиниму сөзлиригә илавә қилди.

«‹йеңи шәпәқ› гезити», «12 – айлиқ ешинча 2 милйард 725 милйон долларға йәтти»  сәрләвһилик хәвиридә, төвәндики учурларни оқурмәнлириниң диққитигә сунди:

2019 – йили нойабирда қәрәлсиз аманәт һесабатлирида 518 милйон долларлиқ қизил рәқәм көрүлгән болсиму, лекин йеқинда елан қилинған учурлар билән бирликтә, 12 айлиқ ешинча 2 милйард 725 милйон долларға йәтти. сайаһәт саһәсидин киргән кирим, 2018 – йилниң нойабир ейиға селиштурғанда 177 милйон доллар ешип, 1 милйард 414 милйон долларға йәтти.

«‹сабаһ› гезити», «борса истанбул  өсүмни бир ханиға чүшүрүш мәнзилгаһиға қарап илгирилимәктә» сәрләвһилик хәвиридә, төвәндики байанларға орун аҗратти:

пул – муамилә базарлирида алдинқи һәптә башланған йахши вәзийәт давамлашмақта. борса истанбул аридин 2 йил өткәндин кейин 120 миң рәқимидин һалқип кәтти. буниңға әгишип, өсүм нисбити % 10.72 билән 2017 – йили йанвардин буйанқи әң төвән сәвийәгә чүшти. түркийәниң хәвп – хәтәр пәрқиму 20 айниң әң төвән сәвийәсигә чүшти.

«‹стар› гезити», «сода ишлири министири руһсар пәкҗанниң африқа сәпири» сәрләвһилик хәвиридә, төвәндики мәлуматларни оқурмәнлириниң диққитигә сунди:

сода ишлири министири руһсар пәкҗан башчилиқидики һәйәт бүгүн нигерийәдә зийарәттә болиду, һәмдә бу даиридә йеңи һәмкарлиқ орнитиш имканийәтлири үстидә издиниду.

нигерийәниң пайтәхти абуҗаға қилидиған зийаритидә, африқа әллири билән сода һәм селинма алақиси бар түрк карханичиларму министир пәкҗанға һәмраһ болиду. пәкҗан нигерийәдики зийаритини тамамлиғандин кейин, 15 – йанвар күни маракәш – түркийә селинма вә сода – иқтисад мунбири һәмдә маракәш – түркийә ортақ комитети йиғиниға қатнишиш үчүн маракәшниң пайтәхти рабатқа өтиду.



مۇناسىۋەتلىك خەۋەرلەر