08.11.2019

бүгүнки түркийә мәтбуатлиридин таллап тәййарлиған хәвәрлиримизниң қисқичә мәзмунлири төвәндикичә:

08.11.2019

түркийә авази радийос: «‹хәвәр түрк› гезити», «җумһур рәис әрдоғанниң чақириқи кәң хәлқ аммисиниң қизғин алқишиға еришти» сәрләвһилик хәвиридә, төвәндики мәлуматларни оқурмәнлириниң диққитигә сунди:

йеза игилик вә орманчилиқ ишлири министирлиқиниң «келәчәк үчүн үмид чириғи йандурғин» шоари астида 28 – өктәбир күнидики көчәт тикиш сәпәрвәрлик чақириқи қизғин алқишқа еришти. буниң түрткисидә, 11 милйон 47 миң 430 көчәт тикиш нишанидин бирқанчә күн ичидә һалқип өтүлди. җүмлидин көчәт тикиш сәпәрвәрлик паалийәтлиригә қатнишидиғанларни билдүргәнләрниң сани 12 милйон 915 миң 319 ға йәтти.

җумһур рәис рәҗәп таййип әрдоғанму, кәң хәлқ аммисини 11 – нойабир күни әнқәрә вақти әтигән саәт 11 дин 11 минут өткәндә, мәмликәтниң һәрқайси җайлирида бирла вақитта ишқа ашурулидиған көчәт тикиш паалийитигә қатнишишқа чақирди. әрдоғанниң бу чақириқи  кәң хәлқ аммисиниң қизғин алқишиға еришти.

«‹йеңи шәпәқ› гезити», «әнқа рекорт йаратти» сәрләвһилик хәвиридә, төвәндики мәлуматларға орун аҗратти:

миллий учқучисиз һава аппаратимиз әнқа көктә 26 саәт 30 минут учти, шуниң билән йеңи рекорт йаратти.

әнқа һава шараити начар болсиму кечә – күндүз чарлаш елип бериш, көзитиш, турақлиқ вә һәрикәтлик нишанларни ениқлап чиқиш, һәмдә бирла вақитта көрүнүшләрни мунасивәтлик орунларға йәткүзүш иқтидариға игә.

«‹стар› гезити», «вашингтон түркийәниң америка айропиланлирини көзитишкә башлайдиғанлиқини билдүрди» сәрләвһилик хәвиридә, төвәндики учурларни оқурмәнлириниң диққитигә сунди:

америка қошма иштатлири дөләт мудапиә министирлиқи катипи еллен м. лорд, күндилик мухбирларни хәвәрләндүрүш йиғинида, түркийә русийәдин сетивалған «с - 400 » башқурулидиған бомба системиси арқилиқ йеқинда райондики айропиланларни көзитишкә башлайдиғанлиқини әскәртиш билән бир вақитта,  «с - 400 » башқурулидиған бомба системисиниң бу йилниң ахирлири паалийәткә өтүшиниң мөлчәрлиниватқанлиқини тәкитлиди.

«‹сабаһ› гезити», «йавропа иттипақи түркийәниң иқтисадий әһвалиниң наһайити тез йахшилинишқа башлиғанлиқини билдүрди» сәрләвһилик хәвиридә, төвәндики байанларға орун аҗратти:

йавропа иттипақиниң «дунйаниң 2019 – йиллиқ күз пәсли иқтисадий әһвалиға нәзәр» намлиқ доклатида, түркийәниң иқтисадий әһвалиниң бултурқи  перевот нисбити киризисидин кейин ишләнгән пул – муамилә саһәсини җанландуруш хизмәтлири вә експорт миқдаридики ешишниң түрткисидә наһайити тез йахшилинишқа башлиғанлиқи әскәртилиш билән бир вақитта, түркийәниң иқтисадий тәрәққийатиниң 2020 йили % 3.1, 2021 – йили % 3.5 болидиғанлиқи тәкитләнди.

«‹һөрийәт› гезити», «милйонерларниң аманәт пули 9 ай ичдә 145.4 милйард лираға йәтти» сәрләвһилик хәвиридә, төвәндики мәлуматларни оқурмәнлириниң диққитигә сунди:

банка һесабатида бир милйон түркийә лираси вә униңдин йуқири амәт пули бар болған пул аманәт қойғучиларниң сани 9 ай ичидә 26 миң 763 кә, уларниң амәт пулиниң сани болса 145.4 милйард лираға йәтти.

милйонерларниң сани сентәбир ейиниң ахирида 206 миң 889 ға, уларниң амәт пулиниң миқдари болса бир тирилйон 255 милйард 273 милйон лираға йәтти.



مۇناسىۋەتلىك خەۋەرلەر