07.11.2019

бүгүнки түркийә мәтбуатлиридин таллап тәййарлиған хәвәрлиримизниң қисқичә мәзмунлири төвәндикичә:

07.11.2019

түркийә авази радийоси: «‹сабаһ› гезити», «җумһур рәис әрдоған трамп билән телефонда көрүшти» сәрләвһилик хәвиридә, төвәндики мәлуматларни оқурмәнлириниң диққитигә сунди:

җумһур рәис рәҗәп таййип әрдоған түнүгүн кәчтә америка қошма иштатлири пирезиденти доналд трамп билән телефонда көрүшти. телефон сөһбитидә, икки дөләт мунасивәтлиридин сирт йәнә, районлуқ өзгиришләр һәққидә музакирә елип берилди.

игилинишичә, телефон сөһбити нәтиҗисидә икки рәһбәрниң 13 – нойабир күни вашингтонда бир йәргә җәм болидиғанлиқи йәнә бир қетим җәзмләштүрүлгән.

«‹вәтән› гезити», «министир дөнмәз <фатиһ> намлиқ парахотниң қисқа вақит ичидә нефит қидирип тәкшүрүш паалийәтлирини башлайдиғанлиқини билдүрди» сәрләвһилик хәвиридә төвәндики учурларни оқурмәнлири билән ортақлашти:

енергийә вә тәбиий байлиқлар министири фатиһ дөнмәз, пайтәхт әнқәрәдә чақирилған «12 – нөвәтлик хәлқара енергийә йиғини вә йәрмәнкиси» ниң ечилишидин кейин бәргән байанатида мундақ деди: «<фатиһ> намлиқ нефит қидирип тәкшүрүш парахотимиз финикәдики паалийәтлирини тамамлиғандин кейин, йеқилғу қачилаш үчүн мәрсин ташуҗу портиға кәлди. бирқанчә күнлүк йеқилғу қачилаш вә тәййарлиқ хизмәтлири тамамланғандин кейин, тәкрар биз шималий қибрис түрк җумһурийитидин сетивалған районда  қисқа вақит ичидә нефит қидирип тәкшүрүш паалийәтлирини башлайду.»

«‹стар› гезити», «ички ишлар министири сулайман сойлу түркийәниң терроризмға қарши  күрәш мәсилисидә қорқумсиз икәнликини ейтти» сәрләвһилик хәвиридә төвәндики байанларға орун аҗратти:

ички ишлар министири сулайман сойлу анталйада бәргән байанатида, пүткүл дунйаниң түркийәниң терроризмға қарши  күришини һәйранлиқ илкидә көзитиватқанлиқини тәкитләп мундақ деди: «түркийә терроризмға қарши  күрәш мәсилисидә ирадисиниң қанчилик дәриҗидә қәтий, актип вә қорқумсиз икәнликини оттуриға қоймақта, пүткүл дунйа буни һәйранлиқ илкидә көзәтмәктә.»

«‹йеңи шәпәқ› гезити», «сүрийәдә бихәтәр учур - алақә хизмити ишқа кириштүрүлди» сәрләвһилик хәвиридә, төвәндики учурларни оқурмәнлириниң диққитигә сунди:

«<тинчлиқ булиқи> һәрбий һәрикити» дин кейин бөлгүнчи террорлуқ тәшкилати  й п г/п к к дин тазиланған районларда муқимлиқни сақлаш үчүн хизмәт ишлинишкә башланди. түркийә, дохтурхана, навайхана вә почтихана қатарлиқ мулазимәтләрдин сирт йәнә, учур - алақә ишлирида кәм болса болмайдиған интернет вә телефон тори мулазимитиниму мәркизи газиантәптики йәрлик бир ширкәт арқилиқ ишқа ашурмақта. бу һәм сүрийәликләрниң күндилик һайатини қийинчилиқтин халий һалда давамлаштурушида, һәмдә бу сайида еришилгән муһим учурлар нәтиҗисидә террорчиларниң қолға чүшүрүлүшидә муһим рол ойнимақта.

«‹һөрийәт› гезити», «өктәбир ейида 267.3 милйон долларлиқ зиннәт буйумлири екиспорт қилинди» сәрләвһилик хәвиридә, төвәндики мәлуматларни оқурмәнлириниң диққитигә сунди:

зиннәт буйумлири експортчилири бирликиниң билдүрүшичә, өктәбир ейида 267 милйон 293 миң 310 долларлиқ зиннәт буйумлири експорт қилинған. 10 айлиқ експорт миқдари болса 3 милйард 488 милйон долларға йәткән.



مۇناسىۋەتلىك خەۋەرلەر