22.07.2019

türkiye awazi radiyosi: «<star> géziti», «erdoghan dunyagha qibris heqqide signal bérip, zörür tépilsa yene qilimiz (dédi)» serlewhilik xewiride, jumhur reis rejep tayyip erdoghanning, sherqiy aq déngizdiki soghuqchiliqning külenggisi astida tebriklengen qibris tinchliq herikitining yil aylinish künini tebriklesh paaliytiide dunyani roshen shekilde agahlandurghanliqini yazdi.

xewerde, erdoghanning «türkiye tinchliq herikiti, qibris arilining teng hoquqluq igiliridin biri bolghan qibris türk xelqining heq we menpeetlirini qoghdash meqsitide élip bérildi. türk armiyesi, qibris türklirining jan we mal – mülük bixeterliki xewpke duch kelgende, 45 yil burunqi qedemni tashlash üchün ikkinilip olturmaydu» dégenliki qeyt qilindi.

«<yéngi shepeq> géziti», «fuat oqtay, sherqiy aq déngizdiki paaliyetlirimizni qetiylik bilen dawamlashturimiz (dédi)» serlewhilik xewiride, jumhur reis yardemchisi fuat oqtayning sherqiy aq déngizda dawamlishiwatqan énérgiye kirizisi toghrisida toxtilip, «türkiyeni antalya qoltuqi bilenla cheklep qoyushni oylishiwatqanlar shuni bilishliri kérekki, déngiz tewelikimizde izdesh – burghilash paaliyetlirimizni qetiylik bilen dawamlashturimiz» dégenlikini yazdi.

xewerde, dölet menpeetini közligen halda sherqiy aq déngizda izdesh paraxotliri we burghilash supilirining herjehettin muhapizet qiliniwatqanliqini eskertken fuat oqtayning «türk déngizchiliri egede we sherqiy aq déngizda döletning we qibris türklirining heq – hoquqlirining, tinchliq we bixeterlikning kapalitidur» dégenliki bildürüldi.

«<hörriyet> géziti», «iqtisadta milyard dollarliq diplomatiye» serlewhilik xewiride, jumhur reislik mehkimisi maliye ishliri ishxanisining, istanbulni xelqara maliye merkizige aylandurush üchün, dunyaning meblegh sélish imkaniyiti eng yuqiri döletliri bilen alaqe ornitishqa bashlighanliqini, bu dairide xongkong, béyjing we shangxeyde yuqiri derijilik uchrishishlarni ötküzgenlikini yazdi.

xewerde, asiya pul – muamile orunliri bilen ötküzülgen uchrishishlarning, london we nyu yorkqa oxshash bashqa merkezler bilenmu ötküzülüshining pilanliniwatqanliqi qeyt qilindi.

xewerde körsitilishiche, maliye ishliri ishxanisi, uchrishishlarda türkiyediki sélinma imkaniyetliri toghrisida melumat béridiken, üchinchi döletlerde ortaq layihelerni ishqa ashurush boyiche hemkarliq ornitish imkaniyetlirige qarap chiqidiken.

«<xabertürk> géziti», «mushundaq dawamlashsa, antalyada 16 milyon sayahetchi kütüwélish nishanidin halqip kétilidu» serlewhilik xewiride, dunyaning köpligen döletliridin kelgen méhmanlarni kütüwéliwatqan antalyagha, bu yil hazirghiche 6 milyon 914 ming 909 chet ellik sayahetchining kelgenlikini yazdi.

xewerde, kespiy méhmanxana bashqurghuchiliri jemiyiti bashliqi ülkay atmajaning «herkünni rékort xewerliri bilen bashlawatimiz. bir künde 96191 adem bilen tarixning künlük yoluchilar rékorti yaritildi. mushundaq dawamlshidighan bolsa, 16milyon chet ellik sayahetchi kütüwélish nishanimizdin halqip kétimiz» dégen sözlirige orun bérildi.

«<weten> géziti», «minglarche kishi boghuzda su üzdi» serlewhilik xewiride, istanbul boghuzida 31 – nöwetlik qitelerara su üzüsh musabiqisining ötküzülgenlikini yazdi.

xewerde, 30 yildin buyan türkiye we istanbulning tonulushigha körünerlik hesse qoshup kéliwatqan, «dunyaning eng yaxshi üsti ochuq su üzüsh paaliyiti» unwanigha ige musabiqige türkiye we 59 chet dölettin kelgen jemiy 2400 su üzüsh mahirining ishtirak qilghanliqi bildürüldi.

xewerde körsitilishiche, qiteler ara su üzüsh musabiqiside dunya rékortlirini buzup tashlighan dominikliq mahir markos diaz bilen dunya ochuq su üzüsh birliki teripidin 2018 – yilining eng yaxshi tenheriketchisi dep tallanghan moldawiyelik ion lazéréns tironmu beygige chüshti.