04.07.2019
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
türkiye awazi radiyosi: «‹star› géziti», «jumhur reis rejep tayyip erdoghan adaletke asaslinidighan bir dunya tüzümi ornitish lazimliqini éytti» serlewhilik xewiride, töwendiki melumatlarni oqurmenlirining diqqitige sundi:
jumhur reis rejep tayyip erdoghan 8 – nöwetlik xelqaraliq oqughuchilar oqush püttürüsh murasimida qilghan sözide, mundaq dédi: «meyli qeyerde yashanglar, meyli qandaq ish bilen shughullininglar, bu dölet (türkiye) bilen, biz bilen bolghan munasiwitinglarni esla üzüp qoymanglar. eng muhimi silerning ortaq tilinglardur. adaletke asaslinidighan yer shari xaraktérlik bir dunya tüzümi ornatqangha qeder mürini mürige tirep küresh qilishimiz kérek.»
«‹sabah› géziti», «fethullahchi térrorluq teshkilatigha alaqidar höjjetlik filim tunji qétim bélgiyede qoyuldi» serlewhilik xewiride, töwendiki uchurlarni oqurmenlirining diqqitige sundi:
jumhur reislik sariyi uchur - alaqe ishliri bashqarmisining pilan - layihesi dairiside, « TRT World » teripidin ishlengen, «fethullahchi térrorluq teshkilatining heqiqiy we qarangghu yüzi» eks ettürülgen « The Network » namliq höjjetlik filim tunji qétim bélgiyening paytexti biryussélda qoyuldi.
«‹höriyet› géziti», «rusiye we türkiyening tirishchanliqliri xelqaraliq muqimliqning kapaliti» serlewhilik xewiride, töwendiki melumatlargha orun ajratti:
rusiye pirézidénti wiladimir putin, döliti we türkiyening süriyediki tinchliq ornitish tirishchanliqlirining xelqaraliq muqimliqning eng muhim kapaliti ikenlikini eskertti, hemde türkiyening moskwa bash elchisi mehmet samsarning «ishench xéti» ni tapshuruwalghanda qilghan sözide, ikki dölet otturisidiki hemrahliqning istiratégiyelik sewiyesige yetkenlikini, türkiye jumhuriyiti jumhur reisi rejep tayyip erdoghan bilen dawamliq alaqe ornitip turidighanliqini qeyt qildi.
«‹weten› géziti», «türkiye hawa yolliri shirkitidin yéngiche sayahet mulazimiti» serlewhilik xewiride, töwendiki bayanlargha orun ajratti:
türkiye hawa yolliri shirkiti Versace bilen Mandarina Duck teripidin alahide tüzüp chiqilghan mulazimet pilanini yoluchilar üchün yolgha qoyushqa bashlidi. shirket, seper üstide yoluchilar éhtiyajliq bolidighan paypaq, qulaq purupkisi, ilghar köz tosquch, agahlandurush signali, chach qisquch qatarliqlarni mulazimet pirogrammisigha ilawe qildi.
«‹yéngi shepeq› géziti», «istanbul ayrodurumining yoluchilar sanida rékort yaritildi» serlewhilik xewiride, töwendiki melumatlarni oqurmenlirining diqqitige sundi:
türkiyening eng muhim qurulush layiheliridin biri bolghan istanbul ayrodurumi peqet uchush jehettinla emes, yoluchilar sanining köp bolushi jehettinmu rékort yaratti.
2019 – yili 6 – apréldin hazirghiche ichki – tashqi liniyelerde jemiy 100 ming qétimliq uchushta 15 milyon 988 ming 748 yoluchi istanbul ayrodurumidin behrimen boldi.
