06.05.2019

bügünki türkiye gézitliridin tallap teyyarlighan xewerlirimizning qisqiche mezmunliri töwendikiche:

06.05.2019

türkiye awazi radiyosi: «<star> géziti», «nato we türkiye arqa – arqidin s – 400 toghrisida bayanat (berdi)» serlewhilik xewiride, shimaliy atlantik ehdi teshkilati – nato bash katipi yéns stolténbérgning (türkiyening) rusiyedin s – 400 sétiwélishi toghrisida toxtilip, <herbiy eslihelerni sétiwélish mesilisi döletlerning milliy qararliri hésablinidu> dégenlikini yazdi.

xewerde yene, jumhur reis yardemchisi fuat oqtayningmu bu heqte toxtilip, « s – 400 toghrisidiki qarar chiqirilip boldi. türkiye bir kélishimge imza qoyghan, wede qilghandin kéyin, u wediside turidu» dégenliki qeyt qilindi.

«<xabertürk> géziti», «ministir xulusi aqar qibris toghrisida toxtaldi» serlewhilik xewiride, dölet mudapie ministiri xulusi aqarning, türkiyening, sherqiy aq déngiz we egede xelqara qanunda körsitilgen öz heqliri bilen birlikte, kapaletchi dölet bolghanliqi tüpeyli shimaliy qibris türk jumhuriyiti xelqining heqlirinimu herdaim muhapizet qilish we u heqte xalighanche höküm chiqirishqa yol qoymasliq iradisining qetiy ikenlikini éytqanliqini yazdi.

gézitning xewiride, ministir aqarning, girétsiyelik emeldarlarning ege we sherqiy aq déngiz toghrisidiki bayanatliri heqqide toxtilip, ularni soghuqqan bolushqa we hemkarliq ornitishqa chaqirghanliqi eskertildi.

xewerde yene, ministir aqarning, türkiyening milliy heqliri we menpeetlirini zörür tépilghanda paal, küchlük we hörmetke sazawer milliy küch amillirigha tayinip muhapizet qilishqa teyyar ikenlikini sözlirige ilawe qilghanliqi bildürüldi.

«<hörriyet> géziti», «qushadasigha sayahet paraxotliri berikiti (yaghdi) serlewhilik xewiride, gollandiye we malta bayraqliq ikki sayahet paraxotining 3560 yoluchisi bilen tünügün aydinning qushadasi nahiyesige kélip toxtighanliqini xewer qildi.

xewerde, «ege port» portigha kelgen malta bayraqliq «Celestyal Crystal» we gollandiye bayraqliq «Koningsdam» namliq paraxot bilen kelgen sayahetchilerni xelq oyunliri senetchilirining kütüwalghanliqi bildürüldi.

gézitning xewiride körsitilishiche, köp sanliqi amérikiliqlardin teshkil tapqan sayahetchilerning bir qismi sayahet aptomobilliri bilen efes qedimiy shehiri, meryem ana we bashqa sayahet orunlirini aylanghan, sayahet pirogrammisigha qatnashmighan sayahetchiler bolsa, sheher merkizini kezgen.

«<yéngi shepeq> géziti», «(bu yilning) deslepki töt éyida 84 milyon dollarliq güle éksport (qilindi) serlewhilik xewiride, dunya güle ishlepchiqirishining %85 i igileydighan malatyadin bu yilning deslepki 4 éyida 33 ming 910 tonna güle éksport qilinip, 84 milyon 710 ming 900 dollar kirim hasil qilinghanliqini yazdi.

xewerde, mezkur sheherning ötken yilning deslepki töt éyida 29 ming 868 tonna güle éksport qilip, 85 milyon 933 ming 507 dollar kirim hasil qilghanliqi qeyt qilindi.

«<sabah> géziti», «jüneyt chaqir liwérpul – barsélona musabiqisige yétekchilik qilidu» serlewhilik xewiride, ete (7 – may seyshenbe), liwérpul bilen barsélona komandiliri arisida ötküzülidighan chémpiyonlar birleshmisining yérim hel qilghuch musabiqisigha türk répér jüneyt chaqirning riyasetchilik qilidighanliqini yazdi.

xewerde, engliyening liwérpul shehiridiki anfiéld rod meydanida türkiye waqti saet 22:00 de bashlinidighan musabiqide, bahattin duran bilen tariq ongunning jüneyt chaqirning yardemchiliri süpitide wezipe öteydighanliqi bildürüldi.


خەتكۈچ: türkiye , metbuat , gézit , uyghurche

مۇناسىۋەتلىك خەۋەرلەر