06.05.2019

бүгүнки түркийә гезитлиридин таллап тәййарлиған хәвәрлиримизниң қисқичә мәзмунлири төвәндикичә:

06.05.2019

түркийә авази радийоси: «<стар> гезити», «нато вә түркийә арқа – арқидин с – 400 тоғрисида байанат (бәрди)» сәрләвһилик хәвиридә, шималий атлантик әһди тәшкилати – нато баш катипи йенс столтенбергниң (түркийәниң) русийәдин с – 400 сетивелиши тоғрисида тохтилип, <һәрбий әслиһәләрни сетивелиш мәсилиси дөләтләрниң миллий қарарлири һесаблиниду> дегәнликини йазди.

хәвәрдә йәнә, җумһур рәис йардәмчиси фуат оқтайниңму бу һәқтә тохтилип, « с – 400 тоғрисидики қарар чиқирилип болди. түркийә бир келишимгә имза қойған, вәдә қилғандин кейин, у вәдисидә туриду» дегәнлики қәйт қилинди.

«<хабәртүрк> гезити», «министир хулуси ақар қибрис тоғрисида тохталди» сәрләвһилик хәвиридә, дөләт мудапиә министири хулуси ақарниң, түркийәниң, шәрқий ақ деңиз вә әгәдә хәлқара қанунда көрситилгән өз һәқлири билән бирликтә, капаләтчи дөләт болғанлиқи түпәйли шималий қибрис түрк җумһурийити хәлқиниң һәқлириниму һәрдаим муһапизәт қилиш вә у һәқтә халиғанчә һөкүм чиқиришқа йол қоймаслиқ ирадисиниң қәтий икәнликини ейтқанлиқини йазди.

гезитниң хәвиридә, министир ақарниң, гиретсийәлик әмәлдарларниң әгә вә шәрқий ақ деңиз тоғрисидики байанатлири һәққидә тохтилип, уларни соғуққан болушқа вә һәмкарлиқ орнитишқа чақирғанлиқи әскәртилди.

хәвәрдә йәнә, министир ақарниң, түркийәниң миллий һәқлири вә мәнпәәтлирини зөрүр тепилғанда паал, күчлүк вә һөрмәткә сазавәр миллий күч амиллириға тайинип муһапизәт қилишқа тәййар икәнликини сөзлиригә илавә қилғанлиқи билдүрүлди.

«<һөррийәт> гезити», «қушадасиға сайаһәт парахотлири бәрикити (йағди) сәрләвһилик хәвиридә, голландийә вә малта байрақлиқ икки сайаһәт парахотиниң 3560 йолучиси билән түнүгүн айдинниң қушадаси наһийәсигә келип тохтиғанлиқини хәвәр қилди.

хәвәрдә, «әгә порт» портиға кәлгән малта байрақлиқ «Celestyal Crystal» вә голландийә байрақлиқ «Koningsdam» намлиқ парахот билән кәлгән сайаһәтчиләрни хәлқ ойунлири сәнәтчилириниң күтүвалғанлиқи билдүрүлди.

гезитниң хәвиридә көрситилишичә, көп санлиқи америкилиқлардин тәшкил тапқан сайаһәтчиләрниң бир қисми сайаһәт аптомобиллири билән әфәс қәдимий шәһири, мәрйәм ана вә башқа сайаһәт орунлирини айланған, сайаһәт пирограммисиға қатнашмиған сайаһәтчиләр болса, шәһәр мәркизини кәзгән.

«<йеңи шәпәқ> гезити», «(бу йилниң) дәсләпки төт ейида 84 милйон долларлиқ гүлә експорт (қилинди) сәрләвһилик хәвиридә, дунйа гүлә ишләпчиқиришиниң %85 и игиләйдиған малатйадин бу йилниң дәсләпки 4 ейида 33 миң 910 тонна гүлә експорт қилинип, 84 милйон 710 миң 900 доллар кирим һасил қилинғанлиқини йазди.

хәвәрдә, мәзкур шәһәрниң өткән йилниң дәсләпки төт ейида 29 миң 868 тонна гүлә експорт қилип, 85 милйон 933 миң 507 доллар кирим һасил қилғанлиқи қәйт қилинди.

«<сабаһ> гезити», «җүнәйт чақир ливерпул – барселона мусабиқисигә йетәкчилик қилиду» сәрләвһилик хәвиридә, әтә (7 – май сәйшәнбә), ливерпул билән барселона командилири арисида өткүзүлидиған чемпийонлар бирләшмисиниң йерим һәл қилғуч мусабиқисиға түрк репер җүнәйт чақирниң рийасәтчилик қилидиғанлиқини йазди.

хәвәрдә, әнглийәниң ливерпул шәһиридики анфиелд род мәйданида түркийә вақти саәт 22:00 дә башлинидиған мусабиқидә, баһаттин дуран билән тариқ онгунниң җүнәйт чақирниң йардәмчилири сүпитидә вәзипә өтәйдиғанлиқи билдүрүлди.



مۇناسىۋەتلىك خەۋەرلەر