02.05.2019

бүгүнки түркийә мәтбуатлиридин таллап тәййарлиған хәвәрлиримизниң қисқичә мәзмунлири төвәндикичә:

02.05.2019

«‹хәвәр түрк› гезити», «америка қошма иштатлири пирезиденти доналд трампниң түркийәдә дөләт ишлири зийаритидә болуши  күнтәртиптә» сәрләвһилик хәвиридә, төвәндики мәлуматларни оқурмәнлириниң диққитигә сунди:

җумһур рәислик сарийи тәрипидин елан қилинған «америка қошма иштатлири пирезиденти доналд трампниң ийул ейиниму өз ичигә алған мувапит пәйттә түркийәдә дөләт ишлири зийаритидә болуши үчүн хизмәт ишлиниватиду» темилиқ байанатта, вақит ениқ бекитилгән тәқдирдә, бу доналд трампниң түркийәдә һакимийәт бешиға чиққандин буйанқи тунҗи зийарити болидикән.

«‹стар› гезити», «түркийәниң сүрийәниң шималидики барлиқ террорчиларни тәлтөкүс йоқитиш ирадиси қәтий» сәрләвһилик хәвиридә, төвәндики учурларни оқурмәнлириниң диққитигә сунди:

җумһур рәислик сарийи байанатчиси ибраһим қалин америка қошма иштатлириниң сүрийә алаһидә вәкили җәймс җефрей билән пайтәхт әнқәрәдә бир йәргә җәм болди.

түркийәниң миллий бихәтәрликиниң наһайити муһимлиқи тәкитләнгән учришишта, «фират дәрйаси» ниң шәрқий қисмида вә сүрийә миқйасида терроризмға қарши  күрәш, бихәтәр район бәрпа қилиниши, мунбич йол хәритиси даирисидики пиланниң ишқа ашурулуши, даеш, п к к/й п г/п й д ни өз ичигә алған барлиқ террорлуқ тәшкилатлириға қарши  күрәш, идлиб келишимигә риайә қилиш, сүрийәниң земин пүтүнлүки қоғдап қелинған асаста киризисниң сийасий йоллар арқилиқ һәл қилиниши вә сүрийәни қайта қуруп чиқиш қатарлиқ мәсилиләр музакирә қилинди.

«‹йеңи шәпәқ› гезити», «җумһур рәис рәҗәп таййип әрдоған мусулман болған америкилиқ шахшичи делла майлсни тәбриклиди» сәрләвһилик хәвиридә, төвәндики мәлуматларға орун аҗратти:

җумһур рәис рәҗәп таййип әрдоған айаллар вә демократийә фонди тәрипидин истанбулда чақирилған хизмәт йиғиниға иштирак қилди. әрдоған вә рәпиқиси әминә әрдоған мусулман болған вә истанбулда зийарәттә болуватқан америкилиқ нахшичи делла майлсни хизмәт йиғиниға тәклип қилди, һәмдә мусулман болғанлиқи үчүн уни тәбриклиди.

америкилиқ нахшичи майлс җумһур рәис рәҗәп таййип әрдоған вә рәпиқиси әминә әрдоған билән көрүшкәндин кейин бу һәқтики тәсиратлирини байана қилип мундақ деди: «бүгүн мән бир дунйа рәһбири билән тонушуш пурситигә ериштим, түркийә рәһбири билән қол елишип көрүшүш вә рәпиқиси әминә әрдоған ханим билән қучақлишип көрүшүш шан – шәрипигә наил болғанлиқим үчүн өзүмни толиму бәхтлик һес қилимән.»

«‹вәтән› гезити», «анталйаға кәлгән сайаһәтчиләр санида рекорт бузуп ташланди» сәрләвһилик хәвиридә, төвәндики мәлуматларни оқурмәнлири билән ортақлашти:

бу йил анталйаға кәлгән сайаһәтчиләр сани йеқинқи йиллардикигә селиштурғанда наһайити йүксәк сәвийәагә йәтти. болупму апрел ейида анталйаға кәлгән сайаһәтчиләр санида рекорт бузуп ташланди. бу йилниң дәсләпки үч ейи ичидә 571 миң 207 сайаһәтчи зийарәт қилған шәһәргә, пәқәт апрел ейидила 905 миң 322 сайаһәтчи кәлди.

сайаһәт ширкәтлириниң билдүрүшичә, сайаһәтчиләрниң анталйаға болупму  апрел ейида көп келишиниң сәвәби, «пасха байрими» икән.

«‹һөрийәт› гезити», «түркийә һава йоллири ширкити йавропа мусабиқисидә түркийәдин икки команда һәл қилғуч мусабиқигә қатнишиш салаһийитигә еришти» сәрләвһилик хәвиридә, төвәндики мәлуматларни оқурмәнлириниң диққитигә сунди:

түркийә һава йоллири ширкити йавропа мусабиқисидә анадолу әфәс командиси өз саһәсидә испанийә командиси барселона лассани 71 гә қарши 80 нәтҗә билән йеңип,  7 – 19  - май күнлири испанийә виториа – гастиез шәһиридә өткүзүлидиған һәл қилғуч мусабиқигә қатнишиш салаһийитигә еришти. бу мусабиқидә түркийәдин фәнәрбаһчә беко командиси билән анадолу әфәс командиси испанийәниң реал мадрид вә русийәниң CSKA  москва командилири билән җәңгә чүшиду. бу мусабиқидә ғәлибә қилған командилар 19 – май йәкшәнбә күни өткүзүлидиған мусабиқидә чемпийонлуқ үчүн, йеңилгән командилар болса үчинчилик үчүн  күрәш қилиду.»



مۇناسىۋەتلىك خەۋەرلەر