26.04.2019

bügünki türkiye gézitliridin tallap teyyarlighan xewerlirimizning qisqiche mezmunliri töwendikiche:

26.04.2019

türkiye awazi radiyosi: «<weten> géziti», «térrorluq teshkilatigha yene bir zerbe uruldi» serlewhilik xewiride, türkiye armiyesining tünügün iraqning shimalidiki gara rayonida hawadin zerbe bérish herikiti élip bérip, bölgünchi térrorluq teshkilati p k k  teripidin istihkam, panahlinish orni we oq – dora iskilati qilip ishlitiliwatqan jaylarning bitchit qilip tashlanghanliqini yazdi.

«<star> géziti», «jumhur reis yardemchisi oqtay: türkiye eng islahatchi dölet bolup tonuldi (dédi)» serlewhilik xewiride, jumhur reis yardemchisi fuat oqtayning tünügün enqerede chaqirilghan islahat ishlirini maslashturush kéngishi yighinda söz qilghanliqini yazdi.

gézitning xewiride, jumhur reis yardemchisi oqtayning «türkiye, iqtisadiy tereqqiyat we hemkarliq teshkilatigha eza döletler arisida xelqara biwasite sélinmilarning aldidiki tosuqlarni élip tashlash jehette <eng islahatchi dölet bolup chiqti we yéqinqi 17 yilda 210 milyard dollardin artuq xelqara biwasite sélinmini jelp qilishqa muweppeq boldi» dégenliki qeyt qilindi.

«<sabah> géziti», «darushshefeqe robot kulubi dunyaning eng yaxshi kulubliri qatarigha kirdi» serlewhilik xewiride, «siéméns türkiye» ning qollishigha érishken darushshefeqening «türkiye sultanliri» namliq robot kulubining türkiyeni iptixarlandurushni dawamlashturuwatqanliqini yazdi.

gézitning xewiride, darushshefeqe toluq ottura mektipi robot kulubi oqughuchilirining, özliri yasap chiqqan «tenten» namliq roboti bilen amérika qoshma ishtatlirida 40 dölettin kelgen 15 minggha yéqin oqughuchi riqabetke chüshken xelqaraliq tunji robot musabiqisi (FIRST Robotics Competition) ning hel qilghuch musabiqiside ilham béghishlighuchi inzhénérliq mukapatigha érishkenliki qeyt qilindi.

xewerde körsitilishiche, «türkiye sultanliri» musabiqining xelqaraliq hel qilghuch qismida bu derijidiki mukapatqa érishken tunji türk etriti bolghan.

«<hörriyet> géziti», «rafadan tayfa kölnda küchlük qiziqish qozghidi» serlewhilik xewiride, TRT Çocuk qanilining yaqturup körüshke érishken sizma filimliridin rafadan tayfa pérsonazhlirining tiyatir oyunining, gérmaniyening köln shehiride küchlük qiziqish qozghighanliqini yazdi.

gézitning xewiride, türkiye sirtidiki türkler we qérindash türkiy milletler orgini teripidin orunlashturulghan mezkur paaliyetning diniy ishlar bashqarmisi türk islam birlikining merkiziy binasida ötküzülgenliki bildürüldi.

xewerde yene, heqsiz orunlashturulghan tiyatir oyunlirining ikki qétim qoyulushining pilanlanghanliqi, biraq küchlük telepke asasen töt qétim qoyulghanliqi eskertildi.

«<xabertürk> géziti», «ukrainaliq senetchiler istanbulda körgezme (achti)» serlewhilik xewiride, istanbulgha méhman bolup kelgen ukrainaliq ressamlarning istanbul senet sariyi paaliyetliri dairiside sizghan eserlirining senetsöyelerning bahalishigha qoyulghanliqini xewer qildi.

xewerde, istanbuldin ilham alghan halda resimlirini sizip chiqqan ressamlar sérxiy sawchénko, liliya studinistika, dénis struk, yuriy kowal, andriy roik, olga zarémba we yuriy sawtér qatarliqlarning perqliq téxnikilarni ishlitip resim sizghanliqi qeyt qilindi.

gézitning xewiride körsitilishiche, istanbul senet sariyi, türkiyede ukrainaliq senetchiler bilen bashlanghan bu paaliyitige perqliq döletlerdiki senetchilerningmu ishtirak qilishini kapaletke ige qilishni nishan qilmaqta iken.


خەتكۈچ: türkiye , metbuat , gézit , uyghurche

مۇناسىۋەتلىك خەۋەرلەر