15.04.2019

türkiye awazi radiyosi: «<sabah> géziti», «iraqning shimalida herbiy heriket (élip bérildi)» serlewhilik xewiride, tünügün iraqning shimalida élip bérilghan hawadin zerbe bérish herikitide bölgünchi térrorluq teshkilati p k k teripidin ishlitiliwatqan nishanlarning  yoqitip tashlanghanliqini yazdi.

xewerde, dölet mudapie ministirliqining tiwittér adrési arqiliq bayanat bérip,  «iraqning shimalidiki zap, awashin – basyan, xakurk we qandil rayonlirida élip bérilghan hawadin zerbe bérish heriketliri netijiside bölgünchi térrorluq teshkilati p k k teripidin istihkam, öngkür, panahlinish orni we oq – dora iskilati qilip ishlitiliwatqan jaylar yoqitip tashlandi» dégen ibarilerge orun bérilgenliki qeyt qilindi.

«<weten> géziti», «türkiye hawa yolliri shirkiti tarixiy köchüshtin kéyin 1 milyondin artuq yoluchi toshidi» serlewhilik xewiride, türkiye hawa yolliri shirkiti bash mudiri bilal ekshining zor kölemlik köchüshtin kéyinki yéngi merkezliri bolghan istanbul ayrodurumida kütüwalghan yoluchilar sanini élan qilghanliqini yazdi.

gézitning xewiride körsitilishiche, ekshi, «zor hejimlik köchüshtin bashlap türkiye hawa yolliri shirkiti bolush süpitimiz bilen qonush – qozghilish bolup 4862 qétimliq qatnash arqiliq jemiy 841915 yoluchi toshiduq. tünügünki yoluchilirimiz bilen bir milyondin halqip kettuq. yaxshi kétiwatidu, téximu yaxshi bolidu» dégen.

«<star> géziti», «sayahetchiler 2017 – yili türkiyede 22 milyard 500 milyon dollar xirajet qildi» serlewhilik xewiride töwendiki uchurlarni oqurmenliri bilen ortaqlashti: sayahetchiler 2017 – yili türkiyede 22 milyard 500 milyon dollar xirajet qildi. kanada merkezlik Visual Capitalist shirkiti, chet ellik sayahetchiler eng köp pul xejligen döletlerning tizimlikini turghuzup chiqti. tekshürüshke alaqidar sanliq melumatlargha qarighanda, chet ellik sayahetchiler 2017 – yili türkiyede 22 milyard 500 milyon dollar xirajet qilghan.

«<hörriyet> géziti», «bextlik sheher sinop 1 milyon sayahetchi nishanini zoraytti» serlewhilik xewiride, türkiye istatistika orginining 2014 we 2016 – yilliq tekshürüshlirige asasen, türkiyening eng bextlik shehiri dep qaralghan we ötken yili 1 milyon adem ziyaret qilghan snopqa bu yil tunji bolup kelgen sayahetchilerning gül – chéchekler bilen kütüwélinghanliqini yazdi.

gézitning xewiride,  sayahetchilerning, sinopning tebiiy muhiti we tarixiy makanlirigha qiziqidighanliqlirini bildürgenliki qeyt qilindi.

xewerde, sinop déngizi, uzungha sozulghan qumluq sahilliri, xamsilos tebiet baghchisi, tatlija sharqiratmilirigha oxshash tebiiy güzellikliri bilen aldinqi pilandin orun alidighanliqini, uning yene tarixiy sinop turmisi, qézip tekshürüsh xizmetliri dawamlishiwatqan balatlar xarabiliki we qiyaliqlardiki mazarliqliriningmu diqqetni tartidighanliqi eskertildi.

«<yéngi shepeq> géziti», «galataport dunyagha tonutuldi» serlewhilik xewiride, qurulushi pütkendin kéyin mulazimetchiler bolup jemiy 1 yérim milyon yoluchigha xizmet qilidighan istanbulning birdinbir asasiy porti galataportning, 2019 – yilliq Seatrade Cruise Global yermenkiside tonutulush arqiliq dunyaning aldinqi qatardiki sayahet paraxotliri shirketlirining diqqitini istanbulgha burighanliqini yazdi.

xewerde, 113 dölettin 643 shirket we 11 ming teminligüchi bilen sétiwalghuchi ishtirak qilghan mezkur yermenkide, dunyaning chong shirketlirige istanbul we 2020 – yili martta échilidighan galataportning tonutulghanliqi qeyt qilindi.