08.04.2019

türkiye awazi radiyosi: «<hörriyet> géziti», «ibrahim qalin nétanyahugha naraziliq bildürdi» serlewhilik xewiride, jumhur reislik mehkimisi bayanatchisi ibrahim qalinning, israiliye bash ministiri bunyamin nétanyahuning gherbiy qirghaqtiki qanunsiz köchmenler rayonlirini saylamdin kéyin israiliyege qoshuwalidighanliqi toghrisidiki sözlirige naraziliq bildürgenlikini xewer qildi.

xewerde, qalinning ijtimaiy taratqu toridiki adrési arqiliq bayanat bérip, «bu bayanat nétanyahuning ishghalni yolluqlashturushqa tirishishining yene bir misalidur. yéngidin saylinip qalsa, bu démokratiyening ghelibisi bolamdu yaki ishghalningmu?» dep sorighanliqi qeyt qilindi.

«<xabertürk> géziti», «yiraq sherqliq sayahetchiler sel bolup aqti» serlewhilik xewiride, türkiyening eng köp sayahet qilinghan yéri bolghan pamuqqelening 2019 – yilini yaxshi bashlap, deslepki 3 ayda ziyaretchi sanini %25 ashurghanliqini yazdi.

gézitning xewiride, bu yil ichide 3 milyon sayahetchining ziyaret qilishi kütülüwatqan rayonning bu mezgilde yiraq sherqliq sayahetchilerning küchlük qiziqishini qozghighanliqi, gérman we rus sayahetchilerning aldimizdiki künlerde rayongha yüzlinishining kütülüwatqanliqi eskertildi.

«<sabah> géziti», «33 saette tügidi» serlewhilik xewiride, dunyaning eng chong ayrodurumi bolghan istanbul ayrodurumigha köchüsh xizmetlirining katta arqa sep utuqi bilen axirlashqanliqini yazdi.

xewerde, 45 saet dawamlishishi kütülüwatqan köchüsh xizmetlirining 33 saette axirlashqanliqi, türkiye hawa yolliri shirkitining köchüshtin kéyinki tunji sepirini enqerege qaratqanliqi toghrisidiki uchurlargha orun bérildi.

«<star> géziti», «<jep herkülü> namliq filim qoyulush aldida» serlewhilik xewiride, türk tenheriket tarixida nam qaldurghan merhum éghirliq kötürüsh mahiri naim sülaymanoghluning hayatini eks ettürüp béridighan «<jep herkülü naim sülaymanoghlu» namliq filimning 25- öktebirde tamashibinlar bilen yüz körüshidighanliqini yazdi.

xewerde körsitilishiche, rizhéssorluqini özer feyzioghlu üstige alghan filimning körünüsh rizhéssorluqini martin szésanow, sénariyesini mustafa préshéwa, muzikilirini bolsa, fahir atakoghlu üstige alidiken. filimni ishlesh wezipisini bolsa, «ayla», «müslüm» we «chichero» namliq filimlerning ishligüchisi mustafa uslu üstige alidiken.

«<yéngi shepeq> géziti», «istanbul yérim marafonida kéniye shamili» serlewhilik xewiride, istanbul yérim marafonche yügürüsh musabiqisining ghaliblirining mueyyenleshkenlikini yazdi.

gézitning xewiride körsitilishiche, erler türide kéniyelik bénard négno 59 minut 56 sékuntluq derijisi bilen chémpiyon bolghan, ayallar türidiki chémpiyonluqnimu yene bir kéniyelik tenheriketchi rut chépngétich 1 saet 5 minut 30 deqiqiliq derijisi bilen qolgha keltürgen.