27.12.2018

bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:

1114542
27.12.2018

türkiye awazi radiyosi: «‹xewer türk› géziti», «edliye ministiri abdulhamit gül israiliye edliye ministirigha jawab qayturdi» serlewhilik xewiride, töwendiki melumatlarni oqurmenlirining diqqitige sundi:

türkiye edliye ministiri abdulhamit gül, ammiwi ortaqlishish tor béti Twitter sehipiside élan qilghan bayanatida, israiliye edliye ministiri shakédning «pelestinlik anilarmu öltürülüshi kérek» teriqisidiki shermendilerche bayanatidin kéyin, jumhur reis rejep tayyip erdoghanghimu til uzitishigha jawab qayturup mundaq dédi: «israiliyening bölgünchi térrorluq teshkilati  y p g/p k k ni qollash pursitini gheniymet bilishi qilche heyran qalarliq ish emes.»

«‹weten› géziti», «soda ishliri ministiri pekjan türkiyening 2019 – yilliq soda pilanini élan qildi» serlewhilik xewiride, töwendiki uchurlarni oqurmenlirining diqqitige sundi:

soda ishliri ministiri ruhsar pekjan, bu yil türkiyening éksport ishlirida nahayiti zor muweppeqiyetlerning qolgha keltürülgenlikini, bu muweppeqiyetlerning dairisining 2019 – yili téximu zorayghan halda dawamlishidighanliqini, jümlidin 2019 – yilliq tashqi soda sahesige alaqidar pilanning mölcherdikidinmu yuqiri sewiyede ishqa éshishining kütülüwatqanliqini tekitlep mundaq dédi: «kéler yili hem soda ishlirimizning tereqqiy qilishi hem sayahet sahelirimizning qolgha keltürgüsi muweppeqiyetlirining yenimu yüksek sewiyege yétishige egiship, éksport pilanining mölcherdikidinmu yuqiri sewiyede ishqa ashurulushini kütüwatimiz.»

«‹star› géziti», «istanbul soda uyushmisi éksportchilarni yer shari xaraktérlik yermenkiler bilen tonushturidu» serlewhilik xewiride, töwendiki melumatlargha orun ajratti:

istanbul soda uyushmisining mesuli shekip awdagich, türk markilirini xelqaraliq yermenkilerde dunya jamaetchilikige tonushturush üchün heriketke ötkenliklirini tekitlep mundaq dédi: «2019 – yili éksportchilarni yer shari xaraktérlik yermenkiler bilen tonushturimiz, jümlidin kéler yili dunyagha dangliq xelqaraliq 38 yermenkige qatnishimiz, dölitimizni ishlepchiqirish merkizige aylandurush yolida nahayiti muhim paaliyetlerni élip barimiz, uyushmimizgha eza 900 shirkitimiz bilen birlikte 17 ming kiwadrat métirliq sahede ishqa ashurulidighan38 yermenkidin orun élip, türkiyening mehsulatlirini tonushturimiz.»

«‹yéngi shepeq› géziti», «türkiye armiyesining afghanistanda wezipe ötüshige alaqidar qararname türkiye büyük millet mejliside qobul qilindi» serlewhilik xewiride, töwendiki melumatlarni oqurmenlirining diqqitige sundi:

türkiye büyük millet mejlisi omumiy kéngishide, türkiye armiyesining shimaliy atlantik ehdi teshkilati qarmiqida asasiy qanunning 92 – maddisigha asasen afghanistanda wezipe ötüshige alaqidar qararnamining mudditini yene 2 yil uzartish mezmun qilinghan jumhur reislik sariyi qararnamisi qobol qilindi.

igilinishiche, qararname 2019 – yili 6 – yanwardin bashlap ijra qilinidiken.

«‹sabah› géziti», yawropa yadro tetqiqat merkizide türk ayal xojayinlarning sani köpeymekte» serlewhilik xewiride, töwendiki melumatlarni oqurmenliri bilen ortaqlashti:

türkiye 2015 – yili yawropa yadro tetqiqat merkizi CERN gha shérik boldi.

hazirghiche türk shirketliri yawropa yadro tetqiqat merkizide baha talashturup sétish we sétiwélish ishlirida muhim utuqlargha érishti hemde türk soda - sanaetchiler ilghar téxnologiyelik mehsulatlarni ishlepchiqirish we serxillashturush paaliyetlirini keng qanat yaydurdi.

türk karxanichilarning yawropa yadro tetqiqat merkizining baha talashturup sétish pilan – layihelirini ishqa ashuridighan ayal xojayinlirining nisbiti bolsa % 20 tin éship ketti.

igilinishiche, türk ayal xojanlar yawropa yadro tetqiqat merkizining pilan – layihelirini ishqa ashurushtiki alemshumul muweppeqiyetliri bilen yash ayal karxanichilargha ülge bolidiken.



مۇناسىۋەتلىك خەۋەرلەر