11.10.2018

türkiye awazi radiyosi: «‹sabah› géziti», «jumhur reis rejep tayyip erdoghan afriqa ellirige muhim chaqiriqta boldi» serlewhilik xewiride, töwendiki melumatlarni oqurmenlirining diqqitige sundi:

jumhur reis rejep tayyip erdoghan istanbulda chaqirilghan «2 – nöwetlik türkiye – afriqa soda – iqtisad munbiri» yighinining échilishida sözligen nutiqida, mundaq dédi: «biz afriqa qitesidiki diplomatik mewjudiyitimizni künséri mustehkemliduq, afriqa ellirimu türkiyediki diplomatik wakaletxanilirining sanini 10 din 33 ke yetküzdi. birleshken döletler teshkilati, islam hemkarliq teshkilati qatarliq xelqaraliq sehnilerde, türkiyening yer shari xaraktérlik tinchliq ornitish we adalet berpa qilish nishanini boylap élip bériwatqan heqqaniy kürishini afriqiliq dostlirimiz qizghin qollidi we qollawatidu. emdi barliq afriqiliq dostlirimizgha, qérindashlirimizgha shundaq       chaqiriqta bolimen: kélinglar, soda ishlirimizni yerlik pullar bilen, milliy pullar bilen ishqa ashurayli!»

«‹höriyet› géziti», «istanbuldiki yéngi ayrodurumning béletliri sétilishqa bashlaydu» serlewhilik xewiride, töwendiki uchurlarni oqurmenlirining diqqitige sundi:

türkiye hawa yolliri shirkitining istanbuldiki yéngi ayrodurum üchün bélet sétishi birqanche kün ichide bashlinidu. nahayiti chong merkezning resmiy ishqa kirishtürülüshidin kéyin, türkiye hawa yolliri shirkiti  dölet ichi-sirtidiki bezi uchushlirini bu yerdin bashlaydu. uchush seperliri üchün bélet sétilidighan liniyeler arisida, izmir, adana, enqere, antalya, baku qatarliq sheherler bilen shimaliy qibris türk jumhuriyitimu bar. yéngi ayrodurumning yoluchilar ülüshining % 70 ti türkiye hawa yolliri shirkitige ait bolidu. yéngi ayrodurumgha toluq yötkilish xizmiti bolsa 30 – 31 – dékabir künliri ishqa ashurulidu.

«‹weten› géziti», «<ataq> namliq tik uchar ayropilanlar téxnikiliq jehettin téximu ilgharlashturulidu» serlewhilik xewiride, töwendiki melumatlargha orun ajratti:

dölet xewpsizlik küchlirining qol ilkidiki «ataq» namliq tik uchar ayropilanlarni téxnikiliq jehettin téximu ilgharlashturush xizmiti dawamlashmaqta. bu dairide «ataq» namliq tik uchar ayropilanlarning uchur - alaqe we éléktronluq urush iqtidarini yenimu östürüsh nishanigha asasen, yéngi yumshaq détallarni seplesh paaliyiti bashlandi.

 «ataq» namliq tik uchar ayropilanlar üchün yene, yerlik motorlarning ishlepchiqirilip, 20  millimétirliq sistémining orunlashturushi nishan qilinmaqta.

«‹xewer türk› géziti», «mughlagha kelgen sayahetchilerning sani % 32 ashti» serlewhilik xewiride, töwendiki bayanlargha orun ajratti:

yéqinqi 9 ay ichide mughlagha kelgen chet ellik sayahetchilerning sani bulturning oxshash mezgilige sélishturghanda % 32 ashti.

mughla medeniyet we sayahet ishliri idarisining muawin bashliqi filiz qarajaaghachning bildürüshiche, mughlagha kelgen chet ellik sayahetchiler arisida engliyelk sayahetchiler köp sanliqni teshkil qilidighan bolup, mughlagha kelgen chet ellik sayahetchilerdin  900 ming 75 i engliyelik, 380 ming 487 i rusiyelik, 177 ming 94 i gérmaniyelik, 168 ming 165 i ukrainaliq, 132 ming 895 i polshaliq iken.

«‹star› géziti», «yerlik we chet ellik  yaghach qonchaq oyuni qoyghuchilar paytext enqerede bir yerge jem bolidu» serlewhilik xewiride, töwendiki melumatlarni oqurmenlirining diqqitige sundi:

bu yil 4 – qétimliqi ishqa ashurulidighan enqere yaghach qonchaq oyuni qoyghuchilar féstiwalida, 9 dölettin 36 yaghach qonchaq oyuni  tamashibinlarning diqqitige sunulidu.

12 – 21 – öktebir künliri ishqa ashurulidighan we enqere til, tarix we jughrapiye fakoltétining «farabi zali» da «sokratning axirqi kéchisi» namliq yaghach qonchaq oyuni bilen bashlinidighan féstiwal dairiside, söhbetler we bes – munaziriler ötküzülidu. ilmiy muhakime yighinliridin sirt yene, ayshe uysalning foto süretliridin teshkil tapqan «qara közlük pérsonazhlar» namliq körgezmimu senetsöyerler bilen yüz körishidu.