09.10.2018

star géziti «mudapie sanaitide 560 milyon dollarliq herbiy apparat ishlepchiqirilidu»serlewhilik xewiride munu uchurlarni oqurmenliri bilen ortaqlashti: «medenchilik we sanaet qatarliq sahelerde nurghun mehsulat ishlepchiqirip kéliwatqan <eti aliyumin>guruhi amérika, xitay, gérmaniye we wéngiriyege oxshash döletlerde ishlepchiqirip kéliniwatqan <süzük herbiy apparati>ni türkiyedimu ishlepchiqirishqa bashlidi. türk inzhénérliri layihelep chiqqan bu apparat arqiliq urush paraxotliri, ayropilanlar, herbiy mashinilar we rakétamiyotlarda ishlitilidighan alahide aliyumin qiyinchiliqi hel bolidu.»

watan géziti «türkiyege 100 milyon dollarliq meblegh»serlewhilik xewiride munu uchurlargha orun ajratti: «polat-tömür we köwrük qurulushliri bilen shughullinip kéliniwatqan shiwétsiye shirkiti türkiye, ottura sherq we shimaliy afriqa qatarliq döletlerge sélishni pilanlighan 100 milyon dollarliq mebleghni türkiyegila salidighanliqini bildürdi. 30yildin buyan yawropa bazirida ishlepchiqirish bilen shughullinip kéliniwatqan <wiyakon>shirkiti türkiyeni merkizi baza qilip 50 dölettiki tarmaq shirketlirini türkiyedin bashquridu.»

yéngi shepeq géziti «ereb sayahetchiliri trabzon iqtisadini janlandurdi»serlewhilik xewiride munu uchurlarni oqurmenlirining diqqitige teqdim qildi: «trabzon soda-sanaet uyushmisi teripidin élip bérilghan ray sinash paaliyitide pars qoltuqi döletliridin kelgen sayahetchilerning sayahet jeryanida otturiche 2340 dollar chiqim qilidighanliqi bildürüldi. uyushma teripidin trabzon ayrodurumi xelqara liniyeler kirish békitide ziyaretchilerning rayi sinaldi. ray sinash paaliyitidin chiqqan netijilerge qarighanda, sayahetchilerning %81.5i tolimu memnun , %16.9si memnun , %1.6si otturahal memnun iken. buningdin sirt trabzongha qilghan sayahitidin memnun bolmighanlar yoq iken. »

sabah géziti «dunya cholpanliri yaqturidighan katér bodrumda  » serlewhilik xewiride munu uchurlarni oqurmenliri bilen ortaqlashti: «jénifér lopéz, héydi kilum, juliya robértisqa oxshash dunyagha meshhur cholpanlar tolimu yaqturidighan <klawud biréyik > namliq heshemetlik katér,mughlaning sayahet <jenniti>hésablinidighan bodrum nahiyesige yétip keldi. katérdiki tik uchar pat-pat bodrum asminida perwaz qildi, katérning 1 heptilik ijrasining 1 milyon 100 ming dollar ikenliki bildürüldi. dunya boyiche eng qimmet katérlardin biri bolghan <klawud biréyik>ta su kölchiki, ter munchisi, beden uwulash öyi, kinoxana we beden chéniqturush zali qatarliqlar bar. birla waqitta 40 adem dem alalaydighan katérning bahasi 200 milyon dollar iken. kayman aralliri bayriqi ésilghan bu katérning bodrumda qanche kün turidighanliqi hazirche namelum.»

habertürk géziti «türk putbolchi jengiz ünderni bayrén komandisidin bashqa yene bir komanda telep qildi»serlewhilik xewiride munu uchurlargha orun ajratti: «italiyening rim komandisida top oynaydighan türk putbolchi jengiz ünder toghrisida xewerler tarqaldi. buningdin burun italiye taratquliri jengiz ünderni gérmaniyediki dangliq putbol komandisi bayrén munix telep qilghanliqini xewer qilghanidi. <korré déllo tenterbiye géziti>ning  bu heqtiki xewirige köre, 21 yashliq jengiz ünderni hem bayrén munix hemde borussiya dortmund telep qiliwatqan iken. xewerde rim putbol komandisining jenggiz ünder üchün eng az 60 milyon  yawro yötkilish heqqi telep qilghanliqi bildürüldi.»