26.09.2018

türkiye awazi radiyosi: «yéngi shepeq géziti», türkiye jumhur reisi rejep tayyip erdoghanning amérikaning niyu york shehiride chaqirilghan b d t omumiy kéngishining 73-nöwetlik yighinida söz qilghanliqini xewer qildi.

xewerde, jumhur reis rejep tayyip erdoghanning bölgünchi térrorluq teshkilati p k k gha yardem qilghan amérikani tenqid qilip, türkiyening munbichtin bashlap iraq chégrasighiche bolghan süriye zéminlirini térroristlardin tazilaydighanliqini tekitligenliki qeyt qilindi.

xewerde, jumhur reis rejep tayyip erdoghanning taktikiliq menpeetlerni közlep, «térroristlargha onminglarche yük aptomobilida, minglarche tiransiport ayropilanida qoral bergenler, kélechekte choqum buning ziyinini köridu» dégenliki eskertildi.

«star géziti», jumhur reis rejep tayyip erdoghanning 27-29-séntebir künliri arisida emelge ashurulidighan gérmaniye ziyaritining, ikki dölet munasiwetliride yéngi sehipe achidighanliqini xewer qildi.

xewerde, jumhur reis rejep tayyip erdoghanning gérmaniye pirézidénti woltér stéynmiyir we bash ministir mérkél xanim bilen körüshidighanliqi bildürüldi.

xewerde, jumhur reis rejep tayyip erdoghanning ziyaret daireside yene, ijtimaiy teshkilat wekilliri we gérmaniyediki chong shirketlerning mesulliri bilenmu körüshidighanliqi qeyt qilindi.

«weten géziti», türkiye bilen gollandiye munasiwetlirining normallishish basquchigha kirishidin kéyin, gollandiyening enqerediki bash elchisi bolup wezipige teyinlengen kwasténténytning, türkiye-gollandiye munasiwetliride ijabiy rol oynashni ümid qilidighanliqini éytqanliqini xewer qildi.

gézitning xewiride, kwasténténytning tünügün (25-séntebir) paytext enqerege yétip kelgenliki eskertildi.

xewerde, kwasténténytning ayrodurumda muxbirlarning ziyaritini qobul qilip: «bu yerge kelgenlikimdin nahayiti xushalmen, bu nahayiti muhim waqit, bu yerde yaxshi waqit ötküzüshni we türkiye-gollandiye munasiwetliride ijabiy rol oynashni ümid qilimen» dégenliki bildürüldi.

«hörriyet géziti», rusiyediki eng chong bankisi hésablinidighan «sberbankisi» (Sberbank) ning xéridarlirining, italiyedin qalsila türkiyede eng köp pul xejligenlikini xewer qildi.

xewerde, bankining bayanatigha asaslanghanda, banka xéridarlirining yaz peslide chet elde 141.2 milyard rubli (texminen 2.16 milyard dollar) xejligen bolup, italiyedin qalsila türkiyede eng köp pul xejlengenliki, arqidin ispaniye, firansiye, girétsiye we gérmaniye qatarliq döletlerning kélidighanliqi qeyt qilindi.