قازاقىستاندا سارمات دەۋرىگە ئائىت تارىخىي يادىكارلىقلار بايقالدى

قازاقىستاننىڭ كاسپىي دېڭىزى رايونىدىكى ئاتراۋ ئۆلكىسىدە سارماتلار دەۋرىگە ئائىت قەبرىلەردە ئېلىپ بېرىلغان قېزىش خىزمىتى جەريانىدا نەچچە ئەسىر مۇقەددەمكى دەۋەرلەرگە ئائىت يادىكارلىقلار يورۇقلۇققا چىقتى.

2235107
قازاقىستاندا سارمات دەۋرىگە ئائىت تارىخىي يادىكارلىقلار بايقالدى

ئاتراۋ ۋالىيلىقى مەھكىمىسى بايانات ئېلان قىلىپ، يېقىنقى ئىككى يىلدا رايوندىكى «قارابائۇ-2» قورغىنىدا ئارخېئولوگىيەلىك قېزىش خىزمىتىنىڭ ئېلىپ بېرىلىۋاتقانلىقى، قورغاندىكى توققۇز قەبرىنىڭ يەتتىسىدىن مىلادىدىن ئىلگىرىكى 6-ئەسىردىن مىلادىيە 4-ئەسىرگىچە بۇ رايوندا ياشىغان كۆچمەن خەلق سارماتلارغا ئائىت زىننەت بۇيۇملىرى، قوراللار ۋە ساپال قاچىلار ھەمدە ئىنسان ئىسكىلىتى قالدۇقلىرىنىڭ تېپىلغانلىقىنى ئۇقتۇردى.

تېپىلغان يادىكارلىقلار ئاتراۋ رايونلۇق تارىخ مۇزېيىدا تۇنجى قېتىم كۆرگەزمە قىلىندى؛ ھەر ئىككى تەرىپىگە تاغ يولۋىسى سۈرىتى چۈشۈرۈلگەن، ئېغىرلىقى تەخمىنەن 370 گرام كېلىدىغان ئالتۇن بىلەيزۈك زىيارەتچىلەرنىڭ كۈچلۈك قىزىقىشىنى قوزغىدى.

قازاق ئارخېئولوگ مارات كاسېنوۋ، ئاتراۋ رايونىنىڭ ئالىملار تەرىپىدىن ئۆز ۋاقتىدا «سارمات ئىمپېرىيەسى ھۆكۈم سۈرگەن رايون» دەپ تەرىپلەنگەنلىكىنى ۋە بۇنىڭ ئارخېئولوگىيەلىك قېزىش خىزمەتلىرى ئارقىلىق ئىسپاتلانغانلىقىنى بىلدۈرۈپ: «(سارماتلار دەۋرىگە ئائىت) تېپىلغان قەدىمىي يادىكارلىقلارنىڭ ئومۇمىي سانى 1000 ئەتراپىدا. بۇنىڭ 100ىنى ئالتۇن زىننەت بۇيۇملىرى تەشكىل قىلىدۇ. زىننەت بۇيۇملىرىدا ئادەتتە ئۆز ۋاقتىدا رايوندا ياشىغان يولۋاس، ياۋا توڭگۇز، قاپلان قاتارلىق يىرتقۇچ ھايۋانلارنىڭ رەسىملىرى بار. ئەڭ ئاخىرقى قېتىملىق قېزىش خىزمىتى نەتىجىسىدە تېپىلغان يادىكارلىقلار ئارىسىدا بۇرۇن دۆلىتىمىزدە پەقەت كۆرۈلۈپ باقمىغان ۋە ياخشى ساقلانغان ياغاچتىن ياسالغان ئىككى پىيالە (قەدەھ) بايقىدۇق» دېگەنلەرنى قەيت قىلدى.



مۇناسىۋەتلىك خەۋەرلەر