türk döletliri teshkilatining 11-nöwetlik bashliqlar yighini axirlashti

türkiye awazi radiyosi xewiri: türk döletliri teshkilati bash katipi kubanichbék ömüraliyéw intimak ordo pirézidéntliq mehkimiside muxbirlargha bayanat bérip, türk döletliri teshkilati dölet bashliqliri kéngishining 11-qétimliq yighinining «türk dunyasini kücheytish: iqtisadiy birlik, sijil tereqqiyat, reqemlik kelgüsi we hemmige bixeterlik» témisi astida échilghanliqini bildürdi.

qazaqistan jumhuriyitining «türk dewri» shoari bilen yürgüzgen türk döletliri teshkilati reislik mudditining muweppeqiyetlik ayaghlashqanliqini bildürgen ömüraliyéw, reislik wezipisni ötküzüwalghan qirghizistangha muweppeqiyet tilidi.

u dölet rehberliri, tashqi ishlar ministirliri we munasiwetlik ministirliqlarning türk hemkarliqini kücheytishni nishan qilghan 16 türlük kélishim, qarar we protokolni imzalighanliqini, bu dairide dölet bashliqliri kéngishining 11-nöwetlik yighinining bishkek bayanatinimu imzalighanliqini qeyt qildi.

bayanatta, yéngi türk döletliri teshkilati bayriqining qobul qilinghanliqi, 2025-yili wéngriyening gheyriy resmiy türk döletliri teshkilati yighinigha sahibxanliq qilidighanliqi, türk döletliri teshkilati puqralarni qoghdash méxanizmining qurulidighanliqi, türk yéshil maliye kéngishining tesis qilinidighanliqi, türk dunyasi ghayilirini qoghdash we kücheytishni meqset qilghan türk dunyasi nizamnamisining testiqlanghanliqi we bishkek merkezlik türk döletliri teshkilati eza döletlirining qizil ay jemiyetliri arisida türk qizil ay torining qurulidighanliqi bildürüldi.

bayanatta, bishkekke 2025-yili türk dunyasining reqemlik paytexti unwani bérilgenliki we türk dunyasi nizamnamisi bilen türk döletliri teshkilati daimiy wekiller yolyoruqining qobul qilinghanliqi uqturuldi.

türk döletliri teshkilati merkiziy bankilar kéngishining qurulup, reqemlik iqtisad saheside hemkarliq ornitilidighanliqi tekitlengen bayanatta, alem boshluqi paaliyetliri sahesidiki hemkarliqni mezmun qilghan alem boshluqi paaliyetlirige munasiwetlik ramka kélishimi bilen türk döletliri teshkilatining keng kölemlik til modélini tereqqiy qildurushqa munasiwetlik ramka kélishimining imzalanghanliqi bildürüldi.

bayanatta ghezze we liwandiki weziyetkimu orun bérildi؛ ghezzediki weyran qilghuch insaniy weziyettin chongqur endishe qiliniwatqanliqigha isharet qilinghan bayanatta, puqralargha qara-qoyuq zerbe bérish eyiblendi, birleshken döletler teshkilati xewpsizlik kéngishining munasiwetlik qararlirini öz ichige alghan xelqaraliq qanunlargha uyghun jiddiy we uzun muddetlik urush toxtitishning zörüriyiti tekitlendi.

bayanatta, ghezzege tosalghusiz insaniy yardem yetküzüsh we israiliye-pelestin nizasini ikki döletlik hel qilish charisi asasida adil we uzun muddetlik hel qilishning yollirini tépish chaqiriqigha orun bérildi.

liwanda derhal urush toxtitish telep qilinghan bayanatta, birleshken döletler teshkilatining liwanda turushluq waqitliq tinchliq saqlash qisimlirigha qesten qilinghan hujumlardin chongqur endishe qilinghanliqi qeyt qilindi.