تۈركمەنىستان مىللىي رەھبىرى ئەردوغانغا مىننەتدارلىق بىلدۈردى

تۈركىيە ئاۋازى رادىيوسى خەۋىرى: بەردىمۇھەممەدوۋ TRT Haber قانىلىنىڭ سوئاللىرىغا جاۋاب بەرگەندە، تۈركىيە ئىچى-سىرتىدا ھۆرمەتكە سازاۋەر بولغان ۋە مىليونلارچە كۆرۈرمىنى بار TRT Haber قانىلى بىلەن سۆھبەت ئۆتكۈزۈشنىڭ خۇشاللىنارلىق ئىش ئىكەنلىكىنى، ئۇنىڭ ئۆزىگە تۈركىي دۆلەتلەر ئوتتۇرىسىدىكى مۇناسىۋەتلەر ھەققىدىكى كۆز قارىشىنى بايان قىلىش پۇرسىتى بەرگەنلىكىنى ئېيتتى.

بەردىمۇھەممەدوۋ تۈرك خەلقلىرىنىڭ يىلتىزىنىڭ بىر ئىكەنلىكىنى ئەسكەرتىپ: «بۇ ئەھۋال بىزنىڭ ئۆزئارا مۇناسىۋىتىمىزگە ئالاھىدە مەنە بېغىشلايدۇ. گەرچە بىز مۇستەقىل، ئىگىلىك ھوقۇقلۇق دۆلەتلەر بولساقمۇ، ئەمما بىزنىڭ ئۇزۇن مۇددەتلىك ئورتاق نىشان ۋە مەنپەئەتىمىز بارلىقىنى ئۇنتۇپ قالمايمىز» دېدى.

تۈركمەنىستان مىللىي رەھبىرى بەردىمۇھەممەدوۋ ئۆزىنىڭ تۈرك دۆلەتلىرى تەشكىلاتىنى، تۈرك دۆلەتلىرى ئوتتۇرىسىدىكى ئىقتىسادىي، مەدەنىيەت ھەمكارلىقىنى كۈچەيتىشنى مەقسەت قىلىدىغان بىر تەشكىلات، شۇنداقلا ئۇنى ئىستىقباللىق ۋە ئىشەنچلىك خەلقئارالىق شېرىك دەپ قارايدىغانلىقىنى بىلدۈردى.

بەردىمۇھەممەدوۋ جۇمھۇر رەئىس ئەردوغاننىڭ ئىككى تەرەپلىك مۇناسىۋەتنىڭ تەرەققىياتىغا كۆڭۈل بۆلۈشى ۋە بۇ جەھەتتىكى سەزگۈرلۈكىدىن مىننەتدار ئىكەنلىكىنى تىلغا ئېلىپ: «يېقىندا تۈركمەنىستان پىرېزىدېنتى (سەردار بەردىمۇھەممەدوۋ)نىڭ جانابلىرىنى (جۇمھۇر رەئىس ئەردوغاننى) <تۈركمەن خەلقىنىڭ پەخرىي ئاقساقىلى> دەپ جاكارلىشى جۇمھۇر رەئىس ئەردوغاننىڭ تۈرك دۇنياسىغا قىلغان خىزمەتلىرىنى تەكىتلەش ماھىيىتىگە ئىگە ئىدى» دېدى.