ezerbeyjan eliyéw - pashinyan - mishél üch terep söhbet yighini toghrisida bayanat élan qildi

türkiye awazi radiyosi xewiri: ezerbeyjan tashqi ishlar ministirliqi ezerbeyjan pirézidénti ilham eliyéw, erméniye bash ministiri nikol pashinyan we yawropa ittipaqi kéngishi reisi charléz mishélning tünügün (15-may) ötküzgen 5- qétimliq üch terep yighini heqqide yazma bayanat élan qilip: «yighinni ikki dölet otturisidiki munasiwetni normallashturush musapisini ilgiri sürüsh jehette paydiliq shundaqla ünüm hasil qilish merkezlik boldi, dep qaraymiz» dédi.

tereplerning erméniye bilen ezerbeyjanning tinchliq ornitish kélishim layihesi üstide birdeklik hasil qilish, chégralarning békitilishi we qatnash liniyelirining eslige keltürülüshi qatarliq mesililerde konkrét netijige érishish meqsitide tepsiliy pikir almashturghanliqigha isharet qilinghan bayanatta: «ezerbeyjan terepning rayonning tinchliqi we muqimliqigha kapaletlik qilishtiki meydani yene bir qétim otturigha qoyuldi. döletlerning zémin pütünlükige hörmet qilishning tekitlinishi, bu arqa körünüshte, erméniyeningmu ezerbeyjanning xelqarada étirap qilinghan zémin pütünlükini qobul qilishining tolimu muhimliqi eskertildi.

yighin yene, toqunushtin kéyinki munasiwetni normallashturush üchün muhim bolghan insanperwerlik mesililirini muzakire qilish pursiti bilen teminlidi. bu arqa körünüshte, yoqap ketkenlerning teqdirini aydinglashturush we mina tazilash saheliridiki xizmetlerning süritini tézlitishning ehmiyiti yene bir qétim tekitlendi» dégen ibarilerge orun bérildi.