toqayéw makronning meslihetchisi dumontni qobul qildi

türkiye awazi radiyosi xewiri: qazaqistan pirézidéntliq mehkimisi bayanat élan qilip, pirézidént toqayéwning paytext astanede dölet ishliri ziyaritide boluwatqan firansiye pirézidénti makronning meslihetchisi dumontni aq ordida qobul qilghanliqini, uning toqayéwgha firansiye pirézidénti makronning mektupini tapshurghanliqini bildürdi.

bayanatta körsitilishiche, toqayéf makronning mektupigha rehmet éytqan we firansiyening dölitining yawropadiki eng muhim siyasiy we iqtisadiy shériklirining biri ikenlikini tekitligen.

ötken yili 29 – noyabir makron bilen körüshkenlikidin intayin tesirlengenlikini eskertken toqayéw: «biz xelqara sehnidiki özgirishler, jümlidin ikki dölet munasiwiti we ikki dölet otturisidiki hemkarliqni öz ichige alghan mesililer toghrisida ikki saettin köprek söhbetleshkeniduq» dégen.

u firansiyening qazaqistanning aldinqi qatardiki siyasiy we iqtisadiy shériklirining biri ikenlikini tilgha élip: «biz silerning dölitinglar bilen bolghan hemkarliqimizni qedirleymiz, dölitinglarning xelqara sehnidiki rolini chüshinimiz we firansiyening iqtisadiy yoshurun küchini toghra bahalaymiz» dégenlerni qeyt qilghan.

toqayéw firansiyening 2008 - yili qazaqistan bilen istratégiyelik hemkarliq kélishimi imzalighan yawropa ittipaqigha eza tunji dölet ikenlikige isharet qilip: «men yene bir qétim shuni éytmaqchimenki, döletlirimiz otturisida her qaysi saheler boyiche aktip we ishenchni asas qilghan siyasiy söhbet élip bérilmaqta» dédi.

dumontmu firansiyening qazaqistan bilen bolghan munasiwitini tereqqiy qildurushni xalaydighanliqini otturigha qoydi.