qirghizistan pirézidénti dölitining türkiyediki izdesh – qutquzush etritige rehmet éytti

türkiye awazi radiyosi xewiri: 6 – féwral küni yüz bergen, türkiyening 11 wilayitige éghir talapetlerni yetküzgen, merkizi qahramanmarash bolghan  7.7 we 7.6 balliq yer tewresh apetliridin kéyin hal sorash üchün türkiyege ziyaretke kelgen qirghizistan pirézidénti sadir japparow teripidin qobul qilinghan qirghizistan jiddiy ehwallargha taqabil turush ishliri ministiri boobék ajikéyéw, ministirliqning türkiyede yüz bergen yer tewresh apetliridin kéyinki izdesh – qutquzush paaliyetliri heqqide melumat berdi.

japparow türkiyede yüz bergen tebiiy apetning éghir talapetlerni yetküzgenlikini we «qérindash dölet türkiyege» éghir weyranchiliqlarni élip kelgenlikini eskertip mundaq dédi:

«bu ortaq derd - elem hemme kishini türkiye xelqige yardem qolini sunush üchün bir yerge jem qildi. türkiyediki izdesh – qutquzush xizmetlirige kespiy jehettin mas qedemde qoshqan töhpiliri we bu jeryanda ünümlük ishligen xizmetliri üchün, dölitimizning izdesh – qutquzush etritining barliq ezalirigha rehmet éytimen.»

pirézidént sadir japparow  qirghizistan jiddiy ehwallargha taqabil turush ishliri ministiri boobék ajikéyéwgha izdesh – qutquzush paaliyetlirige qatnishiwatqan shexslerni mukapatlash toghruluq yolyoruq chüshürdi.

boobék ajikéyéw qirghizistan jiddiy ehwallargha taqabil turush ishliri ministirliqining tarixida tunji qétim bir izdesh – qutquzush etritining chet elde izdesh – qutquzush iizmetlirige qatnashqanliqini tekitlep mundaq dédi:

«qirghizistan izdesh – qutquzush etriti xewp – xeterge qarimay xarabiliklerning astida qalghanlarni qutquzushqa tirishti. izdesh – qutquzush paaliyetliri dawamida balilarnimu öz ichige alghan sekkiz kishini xarabiliklerning astidin chiqirip qutquzuwalduq, 198 kishining jesitini taptuq. apet rayonida 124 chédirdin teshkil tapqan chédir sheher berpa qilduq.»

ajikéyéw qahramanmarash we hatay wilayetliridiki izdesh – qutquzush xizmetlirige qatnishiwatqanliqlirini, türkiye axbarat wasitilirining qirghizistan izdesh – qutquzush etritining xizmitige intayin köngül bölgenlikini qeyt qildi.

qirghizistan izdesh – qutquzush etriti tünügün (21-féwral) türkiyede murasim arqiliq qarshi élinghan idi.