chawushoghlu bayramow bilen téléfonlashti

türkiye awazi radiyosi xewiri: tashqi ishlar ministiri mewlüt chawushoghlu hatay wilayitining defne nahiyeside yüz bergen6.4 bal yer tewresh apitidin kéyin, ezerbeyjan tashqi ishlar ministiri jeyxun bayramow bilen téléfonda körüshti.

ezerbeyjan tashqi ishlar ministirliqining bildürüshiche, ikki ministirning téléfon söhbitide, türkiyediki yer tewresh apitide talapetke uchrighan rayonlarni qayta qurush we yéngi sheherlerni berpa qilish pilanliri heqqide muzakire élip bérilghan.

ezerbeyjan tashqi ishlar ministiri jeyxun bayramow ezerbeyjanning qérindash dölet türkiyege her jehettin tégishlik yardem bérishni dawamlashturidighanliqini yene bir qétim tekitligen we tünügün (20-féwral) hatayda yüz bergen yer tewresh apiti heqqide chawushoghludin uchur igiligen.

chawushoghlu apet rayonining weziyiti we turalghu rayoni berpa qilish pilanliri heqqide bayramowgha melumat bérip, hatayda bu qétim yüz bergen yer tewresh apitide aldinqi qétimqi yer tewreshlerde éghir yaki otturahal derijide buzulghan binalarning ziyangha uchrighanliqini qeyt qilghan.

téléfon söhbitide yene, her ikki terep ortaq köngül bölidighan mesililer toghriliqmu özara pikir almashturulghan.

6 – féwral küni qahramanmarash merkez qilip yüz bergen, «100 yildin buyanqi eng chong balayiapet» dep atalghan we türkiyening 11 wilayitige éghir talapet yetküzgen 7.7, 7.6 balliq yer tewresh apiti minglarche kishining jénigha zamin  bolghanidi.