ilham eliyéw iran pirézidénti bilen ezerbeychan elchixanisigha qilinghan hujumni muzakirileshti

türkiye awazi radiyosi xewiri:  ezerbeyjan pirézidéntliqi teripidin  élan qilinghan bayanatta, iran pirézidénti ibrahim reiysining pirézidént eliyéwge téléfon qilghanliqi hemde hujumda hayatidin ayrilghan bixeterlik mesuli üchün teziye bildürüp, yarilanghan amanliq saqlighuchilar üchün salametlik téligenliki uqturuldi.

ilham eliyéw téhran elchixanisigha qilinghan térrorluq herikitini küchlük eyibleydighanliqini we bu qanliq heriketning etrapliq tekshürülishini hemde jinayetchilerning jazalinishini ümit qilidighanliqini bildürdi.

iran pirézidéntliqi teripidin élan qilinghan yazma bayanatta, reiysining ilham eliyéwgha hujumning kölümi heqqide we munasiwetlik organlar teripidin tekshürülgenliki heqqide melumat bérip, «iran bilen ezerbeyjan otturisidiki dostane we qérindashlarche munasiwetler üzülmes kültür we tarixiy rishitlerni asas qilidu» dégenliki bildürüldi.

bayanatta reiysining iran we ezerbeyjan hökümetlirining ikki dölet munasiwitining düshmenlerning tesirige uchrishigha yol qoymaydighanliqini tekitligenliki eskertildi.

ezerbeyjanning téhranda turushluq elchixanisigha qilinghan qoralliq hujumda elchixanining bixeterlik mesuli qaza qilghan we ikki amanliq saqlighuchi yarilanghan idi.

iran dairiliri hujum qilghuchining weqedin kéyin tutulghanliqini élan qilghan idi.

ezerbeyjan tashqi ishlar ministirliqimu hujumni eyiblep, téhranda turushluq elchixanisining tarqaqlashturulidighanliqini uqturghan idi.