abdullahiyan bilen bayramow téléfonlashti
iran tashqi ishlar ministiri hüseyin emir abdullahiyan bilen ezerbeyjan diplomatiye ministiri jeyhun bayramow téléfonda körüshti.
türkiye awazi radiyosi xewiri: ezerbeyjan tashqi ishlar ministirliqining bildürüshiche, ikki ministirning ezerbeyjanning téhran elchixanisigha qilinghan hujum heqqide élip barghan téléfon söhbitide, abdullahiyan, bu hujumning ikki dölet munasiwetlirige selbiy tesir körssitishige yol qoymasliqning zörürlükini tekitligen, hemde hujumni iran we ezerbeyjan dölet xewpsizlik tarmaqlirining hemkarliq asasida tekshürüshi heqqide teklip sunghan.
bir elchixana xadimi hayatidin ayrilghan we ikki xadimi yarilanghan hujumni eyibligen abdullahiyan, hujumda hayatidin ayrilghanlarning aile tawabiatlirigha we bayramowgha teziye bildürgen.
u, bu hujumning ikki döletning düshmenliri teripidin suyiistémal qilinish xewpi barliqini alahide eskertken.
ezerbeyjan diplomatiye ministiri jeyhun bayramow bolsa, abdullahiyanning hujumni ikki döletning bixeterlik we edliye organlirining hemkarliship tekshürüshi heqqidiki teklipige ijabiy inkas qayturghan.
tünügün etigen tereplerde ezerbeyjanning téhran elchixanisigha qilinghan qoralliq hujumda elchixanining amanliqni saqlash ishliri mesuli hayatidin ayrilghan, ikki amanliqni saqlash xadimi yarilanghanidi.
téhran saqchi bashliqi hüseyin rehimi, zorawanning hujumdin kéyin tutulghanliqini we deslepki tekshürüshlerge qarighanda, hujumning «shexsiy we aile mesililiri sewebidin» élip bérilghanliqini bildürgenidi.
ezerbeyjan tashqi ishlar ministirliqi hujumni eyibligen we téhran elchixanisining tarqaqlashturulidighanliqini uqturghanidi.
