қазақистан билән русийә оттурисида «байанат» киризиси йүз бәрди

қазақистан, русийә ташқи ишлар министирлиқиниң байанатчиси марийа захарованиң байанатиға қаттиқ наразилиқ билдүрди...

1889411
қазақистан билән русийә оттурисида «байанат» киризиси йүз бәрди

түркийә авази радийоси хәвири: қазақистан, русийә ташқи ишлар министирлиқиниң байанатчиси марийа захарованиң икки дөләт оттурисидики «баравәр истратегийәлик һәмкарлиқ роһиға мас кәлмәйдиған» байанатлири сәвәбидин, русийәниң астанәдә турушлуқ баш әлчиси алексей бородавкин билән «қаттиқ учришиш» өткүзүлгәнликини уқтурди.

қазақистан ташқи ишлар министирлиқиниң, русийә баш әлчисиниң түнүгүн министирлиққа чақиртилғанлиқи тоғрисидики байанатида: «баш әлчи билән русийә федератсийәси ташқи ишлар министирлиқиниң рәсмий вәкили захарованиң <баравәр истратегийәлик һәмкарлиқ роһиға мас кәлмәйдиған> байанати тоғрисида сөзләштуқ. учришиш наһайити қаттиқти» дегән ибариләргә орун берилди.

русийә ташқи ишлар министирлиқи байанатчиси марийа захарова, қазақистанда бир йотийуб қанилиға: «биз һазир русларни қанчә көп өлтүрсәк, балилиримиз уларни шунчә аз өлтүрүшкә мәҗбур болиду» дегән украинаниң астанәдә турушлуқ баш әлчиси петер врублевискийниң дәм елиштин кейин йәнә астанәдә пәйда болуп, рәсмий паалийәтләргә қатнашқанлиқини тилға елип, қазақистанниң москвада турушлуқ баш әлчиси йәрмәк кошәррбайевниң министирликкә чақиртилғанлиқини билдүргәниди.

қазақистан ташқи ишлар министирлиқи байанатчиси айбәк смадийоровму захарованиң байанат урғусиниң қазақистан билән русийә оттурисидики истратегийәлик иттипақдашлиқ мунасивитиниң характеригә мас кәлмәйдиғанлиқини байан қилип, русийә баш әлчисиниң министирлиққа чақиртилғанлиқини  уқтурғаниди.

смадийоров, украина тәрәпкә баш әлчиниң байанлириниң қазақистанда йашайдиған русларға нисбәтән қобул қилғили болмайдиған сөзләр икәнликини билдүргәнликлирини, йеңи баш әлчи тәйинлинип болғучә петер врублевискийниң вәзипә өтәшни давамлаштуридиғанлиқини қәйт қилғаниди.



مۇناسىۋەتلىك خەۋەرلەر