әзәрбәйҗан йәнә 95 әрмән әскәрниң җәситини әрменийәгә өткүзүп бәрди

түркийә авази радийоси хәвири: әзәрбәйҗан дөләтлик тутқун қилинған, йоқап кәткән вә гөрүгә елинған пуқралар комиссийәси байанат елан қилип, 12 – 14 - сентәбир күнлири йүз бәргән тоқунушларда җенидин айрилған әрменийә әскәрлириниң җәсәтлирини издәш хизмәтлириниң давамлишиватқанлиқини, әзәрбәйҗан һәрбий тәптиш мәһкимиси хизмәтчилири, 95 әрмән әскириниң җәситини тәкшүрүп, һечқандақ зораванлиқ қилиш аламәтлирини байқимиғанлиқини җәзмләштүргәндин кейин, җәсәтләрниң хәлқара қизил кирис һилал ай тәшкилати арқилиқ әрменийәгә тапшуруп берилгәнликини уқтурди.

байанатта, әрмән әскәрлириниң җәсәтлирини өткүзүп бериш хизмәтлириниң давамлишидиғанлиқи билдүрүлди.

әзәрбәйҗан 17 – сентәбирдиму әрменийәгә 32 әскәрниң җәситини өткүзүп бәргәниди.

әзәрбәйҗан дөләт мудапиә министирлиқи, 12 - сентәбир кәчтә әзәрбәйҗанниң дашкәсән, кәлбәҗәр, лачин вә заңгилан тәрәплиридә әрменийә қисимлириниң кәң көләмлик иғвагәрчилик һәрикити қозғиши нәтиҗисидә тоқунушларниң башлинип кәткәнликини уқтурғаниди.

алақидар тәрәпләрниң дипломатик тиришчанлиқлири нәтиҗисидә, әзәрбәйҗан билән әрменийәниң 2 - қарабағ уруши (2020)дин кейинки әң чоң тоқунушни тохтитиш тоғрисида келишкәнлики билдүрүлгәниди.

тоқунуштин кейин, әзәрбәйҗан 79 әскириниң шеһит болғанлиқини елан қилған болса, әрменийә 207 әскириниң өлгәнликини уқтурғаниди.