eliyéw: erméniye normallishish basquchigha ziyankeshlik qildi
ezerbeyjan pirézidénti ilham eliyéw erméniyening 13 – séntebir küni chégra liniyesidiki ighwagerchiliki bilen normallishish basquchigha ziyankeshlik qilghanliqini éytti.
türkiye awazi radiyosi xewiri: eliyéw, tünügün özbékistanning semerqent shehiride chaqirilghan shangxey hemkarliq teshkilati bashliqlar yighinida qilghan sözide, erméniyege özara igilik hoquqi we zémin pütünlükini étirap qilishni asas qilghan tinchliq kélishimining besh asasiy pirinsipini sunghanliqlirini tekitlep mundaq dédi: «emdi biz aldinqi shertler we süniy kéchiktürüshlerni ilgiri sürmestin, tinchliq kélishimi layihesi xizmiti ishleshni bashlishimiz kérek. tolimu epsuski, bu yil 13 – séntebir küni, erméniye ezerbeyjanning dölet chégrasida keng kölemlik herbiy ighwagerchilik qildi. ezerbeyjan qisimliri bu ighwagerchilikning aldini aldi. erméniyening bu ighwagerchiliki ikki döletning normallishish basquchigha qilinghan éghir ziyankeshliktur. shu wejidin, barliq mesuliyet erméniyening herbiy we siyasiy rehberlikige yüklinidu.»
bir qisim xelqaraliq teshkilatlarning öz rolini jari qilduralmasliqining kishini endishige salidighanliqini eskertken eliyéw, birleshken döletler teshkilati xewpsizlik kéngishining 1993-yili chiqarghan, erméniye qoralliq küchlirining ishghaliyet astidiki ezerbeyjan zéminliridin chékinip chiqishni telep qilghan töt qararini ijra qilmasliqini qobul qilghili bolmaydighanliqini éytti.
u yene, qarabagh mesilisini herbiy-siyasiy yollar bilen hel qilish arqiliq, birleshken döletler teshkilati xewpsizlik kéngishining 1993-yili chiqarghan qararlirining ijra qilinishigha kapaletlik qilghanliqlirinimu sözlirige ilawe qildi.
