әлийев: әрмәнләрниң бихәтәрлики капаләт астиға елиниду

әзәрбәйҗан пирезиденти илһам әлийев қарабағдики әрмәнләргә қанундин һалқиған алаһидә имтийаз вә салаһийәт берилмәйдиғанлиқини, лекин уларниң бихәтәрликиниң әзәрбәйҗан дөлити тәрипидин капаләт астиға елинидиғанлиқини ейтти.

1867356
әлийев: әрмәнләрниң бихәтәрлики капаләт астиға елиниду

түркийә авази радийоси хәвири: әлийев, әзәрбәйҗан дөләтлик телевизийә қанилиниң зийаритини қобул қилғанда бәргән байанатида, қарабағдики қанунсиз әрменийә күчлириниң 3 – авғусттики иғвагәрчилики һәққидә тохталди.

әрменийә күчлириниң иғвагәрчилики нәтиҗисидә әзәрбәйҗан армийәсидин бир әскәрниң шеһит болғанлиқини әскәрткән әлийев, бирқанчә саәт давамлашқан «қисас» һәрикитиниң җазалаш характерлик бир тәдбир икәнликини, әзәрбәйҗанлиқ шеһит әскәрниң қениниң дүшмәнгә еғир бәдәл төләткәнликини тәкитләп мундақ деди: «шуңа, әрмәнләр буни һәргизму есидин чиқирип қоймаслиқи керәк. әгәр йәнә бир қетим бундақ иғвагәрчилик қилинса, җаваб йәнә охшаш болиду.»

әлийев, «қисас» һәркитидин кейин йүзләрчә әрменийә әскириниң қарабағ районидин чиқип кәткәнликини, лачин, забуһ вә сус йезилириға қанунсиз орулаштурулған әрмәнләрниң бу җайлардин чиқип кетиши керәкликини тәкитләп мундақ деди: «чүнки, уларниң бу җайларда қелиши әслидә уруш җинайити һесаблиниду. дәрвәқә, бу җәнвә әһдинамисигиму хилаптур.»

у, әрменийә билән әзәрбәйҗан оттурисидики мунасивәтләрни нормаллаштуруш басқучидин қарабағ мәсилисиниң орун алмиғанлиқини әскәртип мундақ деди: «сөһбәт үстилидә қарабағниң салаһийити һәққидә музакириләр елип бериливатқини йоқ. музакирә қилиниватқанлиқи, қарабағда йашаватқан әрмәнләрниң һәқ – һоқуқлири вә бихәтәрлики мәсилисидур. дәрвәқә, мән уларниң һәқ – һоқуқлири вә бихәтәрликиниң әзәрбәйҗан дөлити тәрипидин капаләт астиға елинидиғанлиқини ейтқанидим. мән һәрдаим вәдәмгә әмәл қилимән.»



مۇناسىۋەتلىك خەۋەرلەر