japparow türk tillirida sözlishidighan döletler wekiller ömikining bashliqlirini qobul qildi

türkiye awazi radiyosi xewiri: konféransqa, türkiye jumhuriyiti dölet bixeterlik orginining bashliqi haqan fidanmu ishtirak qildi.

qirghizistan pirézidént mehkimisi axbarat wasitiliri merkizining bildürüshiche, qirghizistan pirézidénti sadir japparow,  cholpan – ata shehiride ötküzülgen  24 – nöwetlik türk tillirida sözlishidighan döletler alahide xizmetler konféransining wekiller ömikining bashliqlirini qobul qilghanda qilghan sözide, yéngi dewr mesililirini hel qilish, qiyin ötkeller hem xirislarni yéngishning yéngiche chare – tedbirlerni teqezza qilidighanliqini tekitlep mundaq dégen: «izchil we sistémiliq xizmet ishligen, ortaq we masliship tirishchanliq körsetkendila andin bu qiyin ötkeller we xirislargha qarshi  küreshte körünerlik netijilerni qolgha keltürgili bolidighanliqi hemmige ayan. bu nuqtidin élip éytqanda, men bu munberning ehmiyetlik we ijabiy muzakirilirining türk dunyasining bixeterlikige muhim töhpe qoshidighanliqigha ishinimen.»

konféransqa qatnashqan döletlerning dölet bixeterlik organliri ara qoyuq uchur – alaqisining bixeterlikni kücheytidighanliqi we xelqaraliq térrorizm, radikalizim we bashqa yer shariwi xirislargha qarshi paal  küresh qilishqa yardemchi bolidighanliqini eskertken japparow, qirghizistan terepning bu qimmetlerge asasen türkiy qérindash xelqler bilen netijilik bir shekilde hemkarlishishni arzu qilidighanliqini qeyt qilghan.

igilinishiche, türk tillirida sözlishidighan döletler alahide xizmetler konféransi, ezerbeyjan, qazaqistan, qirghizistan we türkiyening dölet bixeterlik organliri teripidin 1998 – yili 20 – may küni istanbulda qorulghan.

 özbékistan, türk tillirida sözlishidighan döletler alahide xizmetler konféransigha 2018 – yili eza  bolghan.