җаппаров түрк тиллирида сөзлишидиған дөләтләр вәкилләр өмикиниң башлиқлирини қобул қилди

қирғизистан пирезиденти садир җаппаров 24 – нөвәтлик түрк тиллирида сөзлишидиған дөләтләр алаһидә хизмәтләр (TÜRKON) конферанси вәкилләр өмикиниң башлиқлирини қобул қилди.

1859503
җаппаров түрк тиллирида сөзлишидиған дөләтләр вәкилләр өмикиниң башлиқлирини қобул қилди

түркийә авази радийоси хәвири: конферансқа, түркийә җумһурийити дөләт бихәтәрлик оргининиң башлиқи һақан фиданму иштирак қилди.

қирғизистан пирезидент мәһкимиси ахбарат васитилири мәркизиниң билдүрүшичә, қирғизистан пирезиденти садир җаппаров,  чолпан – ата шәһиридә өткүзүлгән  24 – нөвәтлик түрк тиллирида сөзлишидиған дөләтләр алаһидә хизмәтләр конферансиниң вәкилләр өмикиниң башлиқлирини қобул қилғанда қилған сөзидә, йеңи дәвр мәсилилирини һәл қилиш, қийин өткәлләр һәм хирисларни йеңишниң йеңичә чарә – тәдбирләрни тәқәзза қилидиғанлиқини тәкитләп мундақ дегән: «изчил вә системилиқ хизмәт ишлигән, ортақ вә маслишип тиришчанлиқ көрсәткәндила андин бу қийин өткәлләр вә хирисларға қарши  күрәштә көрүнәрлик нәтиҗиләрни қолға кәлтүргили болидиғанлиқи һәммигә айан. бу нуқтидин елип ейтқанда, мән бу мунбәрниң әһмийәтлик вә иҗабий музакирилириниң түрк дунйасиниң бихәтәрликигә муһим төһпә қошидиғанлиқиға ишинимән.»

конферансқа қатнашқан дөләтләрниң дөләт бихәтәрлик органлири ара қойуқ учур – алақисиниң бихәтәрликни күчәйтидиғанлиқи вә хәлқаралиқ терроризм, радикализим вә башқа йәр шариви хирисларға қарши паал  күрәш қилишқа йардәмчи болидиғанлиқини әскәрткән җаппаров, қирғизистан тәрәпниң бу қиммәтләргә асасән түркий қериндаш хәлқләр билән нәтиҗилик бир шәкилдә һәмкарлишишни арзу қилидиғанлиқини қәйт қилған.

игилинишичә, түрк тиллирида сөзлишидиған дөләтләр алаһидә хизмәтләр конферанси, әзәрбәйҗан, қазақистан, қирғизистан вә түркийәниң дөләт бихәтәрлик органлири тәрипидин 1998 – йили 20 – май күни истанбулда қорулған.

 өзбекистан, түрк тиллирида сөзлишидиған дөләтләр алаһидә хизмәтләр конферансиға 2018 – йили әза  болған.



مۇناسىۋەتلىك خەۋەرلەر